काठमाडौँ, – नेकपाका वरिष्ठ नेता झलनाथ खनालले नेपालको कम्युनिस्ट आन्दोलनलाई कमजोर पार्ने उद्देश्यले देशी-विदेशी शक्तिहरूबाट निरन्तर षड्यन्त्र भइरहेको दाबी गरेका छन्। मदन भण्डारीको ७५औँ जन्मजयन्तीका अवसरमा मदन भण्डारी फाउन्डेसनद्वारा आयोजित विशेष गोष्ठीलाई सम्बोधन गर्दै नेता खनालले यस्तो धारणा राखेका हुन्।

वामपन्थी एकतामा जोड

कार्यक्रममा बोल्दै नेता खनालले वर्तमान राजनीतिक परिस्थितिमा वामपन्थीहरूको एकताबद्ध हुनुको विकल्प नरहेको स्पष्ट पारे। उनले विगतमा सानातिना स्वार्थ र अहङ्कारका कारण कम्युनिस्ट घटकहरूबीच एकता हुन नसकेको स्वीकार गर्दै अब भने दीर्घकालीन सोचका साथ अघि बढ्नुपर्ने बताए।

“वामपन्थी एकता अनन्तकालदेखि आवश्यकता थियो। कहिले सिङ पलायो, कहिले जुरो पलायो, कहिले के पलायो, त्यसैले हामी एकताबद्ध हुन सकेनौँ। तर, अब भने यही दिनबाट वामपन्थी एकतालाई दीर्घकालीन ढंगले अगाडि बढाउने कामको थालनी गरौँ,” खनालले आह्वान गरे।

साम्राज्यवादी र प्रतिक्रियावादीविरुद्ध चुनौती

खनालले देशमा सक्रिय रहेको बताउँदै साम्राज्यवादी र प्रतिक्रियावादी शक्तिहरूले मच्चाइरहेको ‘बबण्डर’ लाई परास्त गर्न वामपन्थी शक्तिहरूको बलियो मोर्चा आवश्यक रहेको जिकिर गरे। उनीहरू एकजुट नभएसम्म मुलुकमा राजनीतिक स्थिरता र जनअपेक्षा अनुरूपको काम हुन नसक्ने उनको बुझाइ छ।

मदन भण्डारीको हत्या ‘रहस्यमयी र षड्यन्त्रपूर्ण’

मदन भण्डारीको स्मरण गर्दै नेता खनालले उनको मृत्युलाई एउटा सामान्य दुर्घटनाका रूपमा नभई ठूलो षड्यन्त्रको रूपमा चित्रण गरे। उनले मदन भण्डारीको हत्या कायरतापूर्ण र रहस्यमयी रहेको उल्लेख गर्दै यसको सत्यतथ्य अझै पत्ता लगाउन नसक्नु आफ्नै कमजोरी भएको स्विकारे।

उनका अनुसार, भण्डारीको हत्या केवल एक व्यक्तिमाथिको आक्रमण नभई समग्र नेपाली कम्युनिस्ट आन्दोलनलाई नै निष्तेज पार्ने सुनियोजित प्रयास थियो। उनले भने, “उहाँमाथि हत्याको षड्यन्त्र रचियो। त्यो नेपालको कम्युनिस्ट आन्दोलनलाई निष्तेज पार्ने देश र विदेशका प्रतिक्रियावादीहरूको षड्यन्त्र हो। यो षड्यन्त्र उहाँमाथि मात्रै होइन, सिंगो कम्युनिस्ट आन्दोलनमाथि जारी छ।”

यस घटनाले नेपाली राजनीतिमा पुनः एकपटक कम्युनिस्ट एकताको बहसलाई सतहमा ल्याइदिएको छ।