काठमाडौं, १४ असार । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले लोकतान्त्रिक र वामपन्थी शक्तिलाई कमजोर पार्ने उद्देश्यले विभिन्न षड्यन्त्र भइरहेको दाबी गर्दै एमाले आफ्ना सिद्धान्त, नीति र संगठनात्मक एकताका कारण त्यस्ता प्रयास असफल पार्न सक्षम रहेको बताउनुभएको छ।

जननेता मदन भण्डारीको ७५औँ जन्मजयन्तीका अवसरमा काठमाडौंमा आयोजित ‘नेपालको कम्युनिस्ट आन्दोलन र जननेता मदन भण्डारी’ विषयक अन्तरक्रिया कार्यक्रममा बोल्दै ओलीले लोकतान्त्रिक शक्तिहरूलाई एक हुन नदिन विगतमा नेपाली कांग्रेस फुटाइएको दाबी गर्दै एमालेलाई पनि कमजोर पार्ने प्रयास भइरहेको टिप्पणी गर्नुभयो। तर जनताको बहुदलीय जनवादको सिद्धान्तबाट निर्देशित एमाले कुनै पनि बाह्य हस्तक्षेपबाट प्रभावित नहुने उहाँको भनाइ थियो।

उहाँले पछिल्लो निर्वाचनमा एमालेले अपेक्षित परिणाम हासिल गर्न नसके पनि पार्टी समाप्त नभएको स्पष्ट पार्दै निर्वाचनको नतिजा केवल एउटा ‘धक्का’ मात्र भएको उल्लेख गर्नुभयो। “हामी लडेका हौँ, मरेका होइनौँ,” भन्दै उहाँले एमाले पुनः सशक्त रूपमा उठेर प्रतिगामी शक्तिलाई लोकतान्त्रिक र शान्तिपूर्ण माध्यमबाट पराजित गर्ने विश्वास व्यक्त गर्नुभयो।

अध्यक्ष ओलीले गत भदौ २३ र २४ गते भएको जेन–जी आन्दोलनलाई प्रतिगामी षड्यन्त्रको संज्ञा दिँदै त्यसले वैधानिक सरकारलाई असंवैधानिक रूपमा विस्थापित गरेको दाबी गर्नुभयो। लोकतान्त्रिक प्रक्रियाविपरीत सरकार परिवर्तनलाई कुनै पनि हालतमा लोकतान्त्रिक आन्दोलन मान्न नसकिने उहाँको भनाइ थियो।

सरकारमा रहँदा आफूहरूले देशलाई बर्बाद नगरेर विकासको दिशामा अघि बढाएको जिकिर गर्दै उहाँले केही कमजोरी भए पनि त्यसको आत्मसमीक्षा गर्न तयार रहेको बताउनुभयो। देशको प्रगति राजनीतिक आरोप–प्रत्यारोपबाट नभई विकासका सूचकका आधारमा मूल्याङ्कन गर्नुपर्नेमा उहाँले जोड दिनुभयो।

ओलीले एमालेले आर्थिक, सामाजिक र परराष्ट्र नीतिमा असाधारण काम गरेको दाबी गर्दै पार्टीको नीति ‘समृद्ध नेपाल, सुखी नेपाली’को लक्ष्यमा केन्द्रित रहेको उल्लेख गर्नुभयो। वाम एकताको कुरा नीति परिवर्तनका लागि नभई मुलुकमा बढ्दो प्रतिगमनको सामना गर्न आवश्यक भएको भन्दै उहाँले राष्ट्रिय सुरक्षा, स्थायित्व र समृद्धिलाई एमालेको प्रमुख प्राथमिकता रहेको बताउनुभयो।