काठमाडौं, १४ असार । पूर्वराष्ट्रपति विद्यादेवी भण्डारीले नेपालको कम्युनिष्ट आन्दोलनलाई समयअनुकूल, जनमुखी र प्रभावकारी बनाउन गम्भीर आत्मसमीक्षा, रचनात्मक पुनरावलोकन र जनतासँगको सम्बन्ध थप सुदृढ गर्नुपर्ने बताउनुभएको छ।

जननेता मदन भण्डारीको ७५औँ जन्मजयन्तीका अवसरमा काठमाडौंमा आयोजित ‘नेपालको कम्युनिस्ट आन्दोलन र जननेता मदन भण्डारी’ विषयक अन्तरक्रिया कार्यक्रममा बोल्दै उहाँले हालैको प्रतिनिधिसभा निर्वाचनको परिणामले कम्युनिष्ट शक्तिहरूलाई आफ्ना कार्यशैली, प्राथमिकता र जनसम्बन्ध सुधार्ने अवसर दिएको उल्लेख गर्नुभयो। तर कुनै एक निर्वाचनको परिणामका आधारमा जनताको बहुदलीय जनवाद वा कम्युनिष्ट आन्दोलनको भविष्यबारे हतारमा निष्कर्ष निकाल्न नहुने उहाँको धारणा थियो।

भण्डारीले बदलिँदो पुस्ता, सामाजिक संरचना, प्रविधिको तीव्र विकास र युवाको नयाँ आकांक्षालाई सम्बोधन गर्दै कम्युनिष्ट आन्दोलनले आफ्ना मूल आदर्श र सिद्धान्तलाई कायम राखेर नीति, कार्यशैली र संगठनात्मक अभ्यासलाई समयअनुकूल परिमार्जन गर्नुपर्नेमा जोड दिनुभयो। उहाँले आत्मसमीक्षा, नवप्रयोग र जनतासँगको जीवन्त सम्बन्धमार्फत आन्दोलनको सान्दर्भिकता र प्रभावकारिता अझ मजबुत बनाउन सकिने विश्वास व्यक्त गर्नुभयो।

संविधान संशोधनको बहसबारे बोल्दै पूर्वराष्ट्रपति भण्डारीले नेपालजस्तो बहुजातीय, बहुभाषिक र बहुसांस्कृतिक मुलुकका लागि प्रत्यक्ष निर्वाचित कार्यकारी शासन प्रणाली उपयुक्त नहुने धारणा राख्नुभयो। उहाँले नेपालको विविध सामाजिक संरचनालाई मध्यनजर गर्दै संसदीय लोकतान्त्रिक प्रणाली नै उपयुक्त हुने तर्क गर्नुभयो।

उहाँले लोकतन्त्र केवल आवधिक निर्वाचनमार्फत जनमत प्राप्त गर्ने प्रक्रियामा सीमित नहुने उल्लेख गर्दै निर्वाचित भएपछि पनि संवैधानिक मर्यादा, विधिको शासन, जनउत्तरदायित्व र लोकतान्त्रिक मूल्य–मान्यताको निरन्तर पालना गर्नु नै सच्चा लोकतान्त्रिक आचरण हुने बताउनुभयो। लोकतान्त्रिक संस्कार र उत्तरदायित्वप्रतिको प्रतिबद्धताले मात्र शासन प्रणालीलाई सफल र विश्वासयोग्य बनाउन सक्ने उहाँको भनाइ थियो।