काठमाडौं, १५असार । सँस्कृति, पर्यटन तथा नागरिक उड्डयनमन्त्री खडकराज पौडेलले नेपालको हवाइ उद्योगको क्षेत्रको सुधारका लागि सरकारले तत्काल केही गर्नसक्ने अवस्था नभएको बताएका छन्।

सोमबार मन्त्रालयमा आयोजित कार्यक्रममा पौडेलले नेपालको हवाइ क्षेत्रमा सरकार आफैँले लगानी गरेर अघि बढाउन सक्ने अवस्था नरहेको स्पष्ट पारेका हुन् । उनले नेपालको हवाइ क्षेत्र सुध्रिँदै भन्दा बिग्रँदै जाने अवस्थामा रहेको तर्क गरे । उनले आफूले प्रयास गरे पनि सबैको गुनासो मात्रै आएको गुनासो गरे।

नेपाल भूपरिवेष्ठित देश भएको कारणले र पर्यटनबाट राष्ट्रले ठूलो आकांक्षा राखेको अर्थबाट यो क्षेत्र हवाइ उद्योगको एउटा ठूलो भूमिका नेपालको विकासमा अडिएको छ। हामी जति संख्यामा पर्यटक भित्र्याउने आकांक्षा देखेका छौँ। त्यही अनुसार हामीले योजनाहरू, नीतिहरू बनाइरहन्छौँ’, उनले भने, ‘तर हवाइ क्षेत्रको अवस्था हेर्दा त्यो देखिँदैन। भएका कम्पनीका साथीहरुको पनि गुनासो मात्रै बढी छ। सप्रिँदै जाने भन्दा बिग्रदै गएजस्तो देखिन्छ। र, अर्कोतिर सरकार आफैँले पनि फेरि चाहेर एउटा तातेताते गराई हालौँ भन्ने अवस्था पनि छैन। धेरै चिजहरूबाट यो कम्प्लिकेट रहेछ भनेर मैले ३ महिनाको दौरानमा थाहा पाएँ । तर अब यो यत्तिकै छोडेर त भएन । यसलाई कुनै न कुनै तरिकाले पार लगाउनुपर्दछ भन्नेमा हामी छौँ।’

मन्त्री पौडेलले पर्यटन उद्योगको विकासका लागि पनि हवाइ क्षेत्र सुधार नगरी सम्भव नरहेको धारणा राखे। उनले ईयूको आकाशमा उडानमा लागेको प्रतिबन्ध हटाउने विषयमा पनि सरकारले नीतिगत, कानूनी र सुरक्षासँग सम्बन्धित मापदण्ड पूरा गर्दै लैजाने काम अघि बढाएको दाबी गरे ।।