काठमाडौं, १७ असार । नेपाल नागरिक उड्डयन प्राधिकरणले हवाई इन्धनको मूल्य घटेसँगै हवाई भाडा समायोजन गरेको छ ।

प्राधिकरणले सबै वायुसेवा कम्पनीलाई पत्राचार गर्दै भाडा समायोजनको जानकारी दिएको हो । नेपाल आयल निगमले हवाई इन्धनको मूल्यमा प्रतिलिटर ४० रुपैयाँ कटौती गरेको छ । घटेको भाडादर आजैदेखि लागू हुने पनि प्राधिकरणले जनाएको छ । नयाँ भाडादर अनुसार हवाई भाडामा फ्यूल सरचार्ज अधिकतम २३ सय ३५ रुपैयाँसम्म घटेको छ ।

नेपालगन्ज–भद्रपुर रुटमा १५ हजार ७२५ रुपैयाँ रहेको फ्यूल सरचार्ज अब १३ हजार ३९० रुपैयाँमा झरेको छ भने काठमाडौं–धनगढी रुटमा ११ हजार ८८५ रुपैयाँ रहेको फ्यूल सरचार्ज १० हजार १२० रुपैयाँमा झरेको छ । काठमाडौं–सुर्खेत रुटमा ९ हजार २९५ रुपैयाँ रहेको इन्धनको भाडा ७ हजार ९१५ रुपैयाँमा झरेको छ ।

माउन्टेन फ्लाइटमा रहेको ९ हजार २३५ फ्यूल सरचार्ज अब ७ हजार ८६० रुपैयाँमा झरेको प्राधिकरणले जनाएको छ । फ्यूल सरचार्जमा अन्य शीर्षकहरु थप गरी कुल भाडा तय गर्ने गरिन्छ ।

उता, इन्धनको मूल्य घटेसंगै यातायात ब्यवस्था विभागले पनि सार्वजनिक यातायातको भाडा समायोजन गर्ने तयारी गरेको छ । यातायात ब्यावासायीहरुले पनि घटेको इन्धनको मूल्य अनुसार भाडा समायोजन गर्न विभागलाई आग्रह गरेका छन् ।