काठमाडौं । रौतहटको बृन्दावन नगरपालिका–७ सखुवाका ३१ वर्षीय विजय महरा चमार ‘विजय राम’ जेनजी आन्दोलनका क्रममा पूर्वगभर्नर महाप्रसाद अधिकारीको भैँसेपाटीस्थित घरबाट सुनका गहना लगेको आरोपमा पक्राउ परेका छन्।

ललितपुरको भैँसेपाटी क्षेत्रमा लामो समयदेखि जुत्ता सिलाउने काम गर्दै आएका विजय गत भदौ २४ गते जेनजी प्रदर्शनका क्रममा अधिकारीको घरमा तोडफोड तथा आगजनी हुँदा त्यहाँ पुगेका थिए।

प्रहरीका अनुसार प्रदर्शनकारीले घरभित्रका सामान सडकमा फालिरहेका बेला विजय पनि भीडमा मिसिएका थिए। त्यस क्रममा उनले घरबाट फालिएका सुनका गहना टिपेर आफ्नो डेरामा लगेको प्रहरी अनुसन्धानबाट खुलेको छ।

एक वर्षपछि आफैँ पुगे प्रहरीको सम्पर्कमा

विजयले करिब एक वर्षसम्म उक्त सुन आफ्नो डेरामा राखेको बताइएको छ। गएको साउन २० गते उनले आफूले लगेको सुन फिर्ता गर्न अधिकारीको घरमा पुगेपछि घटना बाहिर आएको हो।

अधिकारी परिवारले विजय सुनसहित घरमा आएको जानकारी प्रहरीलाई गराएपछि उनलाई नियन्त्रणमा लिइएको थियो। त्यसपछि प्रहरीले उनको डेरामा छापा मार्दा थप सुनका गहना फेला पारेको जनाएको छ।

प्रहरीका अनुसार उनले फिर्ता गर्न ल्याएको सुन र डेराबाट बरामद भएका गहनाको कुल मूल्य करिब १० लाख रुपैयाँ बराबर छ।

डेराबाट थप गहना बरामद

ललितपुर प्रहरीले विजयको डेराबाट चाँदीजस्तो देखिने पाउजु, गणेशको मूर्ति, सिक्का, दुईवटा सुनका औँठी, एक मुन्द्रा तथा सातवटा झुम्कासहितका सामग्री बरामद गरेको जनाएको छ।

प्रहरी बयानमा विजयले पक्राउ पर्ने डरका कारण लामो समय राखेको सुन फिर्ता गर्न अधिकारीको घर पुगेको बताएका छन्। उनले सुरुमा एक जोर झुम्का मात्र फिर्ता गर्न गएको बताएका छन्।

चोरी मुद्दा

जिल्ला प्रहरी परिसर ललितपुरले विजयमाथि चोरी मुद्दामा तीन वर्ष कैद र ३० हजार रुपैयाँ जरिवाना माग गर्दै अनुसन्धान प्रतिवेदन जिल्ला सरकारी वकिल कार्यालयमा बुझाएको थियो। सरकारी वकिल कार्यालयले साउन २८ गते अदालतमा मुद्दा दर्ता गरेको हो।

अदालतले विजयलाई ३० हजार रुपैयाँ धरौटीमा छाड्ने आदेश दिएको छ।

विजयको डेराबाट बरामद भएका सुनका गहना अधिकारी परिवारलाई फिर्ता गरिएको प्रहरीले जनाएको छ।

जेनजी आन्दोलनका क्रममा अधिकारीको भैँसेपाटीस्थित घरमा तोडफोड तथा आगजनी हुँदा डेढ करोड रुपैयाँभन्दा बढीको क्षति भएको बताइएको छ।

Originally published on abcnews.com.np.