काठमाडौं — त्रिभुवन विश्वविद्यालय (त्रिवि) को नयाँ उपकुलपति नियुक्ति प्रक्रिया अन्तिम चरणमा पुगेको छ। शिक्षा, विज्ञान तथा खेलकुद मन्त्री सस्मित पोखरेल को अध्यक्षतामा गठित छनोट समितिले तीन जनाको नाम टुंगो लगाएको स्रोतले जनाएको छ।

सिंहदरबार स्रोतका अनुसार समितिले तयार पारेको सिफारिस सूची अब कुलपतिसमक्ष पेश गरिनेछ। त्यसपछि तीन जनामध्ये एक जनालाई त्रिभुवन विश्वविद्यालयको उपकुलपतिमा नियुक्त गरिनेछ। यद्यपि, छनोट समितिले आधिकारिक रूपमा नाम सार्वजनिक गरेको छैन।

यी तीन नाम चर्चामा

त्रिवि स्रोतका अनुसार उपकुलपति नियुक्तिको दौडमा प्रमुख रूपमा तीन शिक्षाविद्को नाम चर्चामा छ।

• भोला थापा
• दुर्गादत्त पौडेल
• नन्दबहादुर सिंह

प्रा.डा. भोला थापा काठमाडौं विश्वविद्यालय का पूर्व उपकुलपति हुन्। उनी विश्वविद्यालयमा उपप्राध्यापकदेखि रजिस्ट्रार हुँदै २०७७ सालमा उपकुलपति बनेका थिए र उच्च शिक्षा प्रशासनमा लामो अनुभव राख्छन्।

प्रा.डा. दुर्गादत्त पौडेलले अमेरिकाको University of Louisiana मा काम गरेको अनुभव बटुलेका छन्। उनले अन्तर्राष्ट्रिय अनुभवलाई नेपालको उच्च शिक्षामा उपयोग गर्ने योजना अघि सारेका छन्।

त्यस्तै प्रा.डा. नन्दबहादुर सिंह मध्यपश्चिम विश्वविद्यालय का पूर्व उपकुलपति हुन्। उनी त्रिभुवन विश्वविद्यालयका प्राध्यापकसमेत रहेका छन् र यसअघि विश्वविद्यालय नेतृत्वको अनुभव हासिल गरिसकेका छन्।

५० आवेदकमध्ये अन्तिम तीन

त्रिभुवन विश्वविद्यालयको उपकुलपतिका लागि खुला प्रतिस्पर्धामार्फत ५० जनाको आवेदन परेको थियो। प्रारम्भिक मूल्याङ्कनपछि १० जनाको सर्टलिस्ट तयार गरिएको थियो। त्यसपछि उम्मेदवारहरूको प्रस्तुतीकरण, अन्तर्वार्ता तथा सार्वजनिक राय–सुझावका आधारमा अन्तिम तीन जनाको नाम छनोट गरिएको हो।

आठ विश्वविद्यालयमा एकैपटक प्रक्रिया

यसैबीच छनोट समितिले त्रिभुवन विश्वविद्यालयसहित आठ विश्वविद्यालयका उपकुलपतिका लागि तीन–तीन जनाको नाम सिफारिसका लागि तयार गरेको छ। यसमा पोखरा विश्वविद्यालय, पूर्वाञ्चल विश्वविद्यालय, लुम्बिनी बौद्ध विश्वविद्यालय, कृषि तथा वन विज्ञान विश्वविद्यालय, मध्यपश्चिम विश्वविद्यालय, सुदूरपश्चिम विश्वविद्यालय र राजर्षि जनक विश्वविद्यालय पनि समावेश छन्।

सरकारले अध्यादेशमार्फत अघिल्ला उपकुलपतिहरू पदमुक्त गरेपछि नयाँ नेतृत्व चयन प्रक्रिया सुरु गरेको हो। विश्वविद्यालयहरूमा राजनीतिक हस्तक्षेप कम गर्दै खुला प्रतिस्पर्धाका आधारमा योग्य नेतृत्व चयन गर्ने उद्देश्यले आवेदन आह्वान गरिएको सरकारको भनाइ छ।