काठमाडौं, १९ असार । उच्च अदालत पाटनले अखिल नेपाल फुटबल संघ (एन्फा) पदाधिकारीलाई विदेश यात्रामा अवरोध नगर्न अन्तरिम आदेश दिएको छ ।

न्यायाधीशद्वय गणेशप्रसाद बराल र तेजेन्द्रप्रसाद शर्मा सापकोटाको संयुक्त इजलासले शुक्रबार (असार १९) एन्फा पदाधिकारी तथा सदस्यहरूको विदेश यात्रामा रोक लगाउने निर्णय तत्काल कार्यान्वयन नगर्न सरकारलाई अन्तरिम आदेश जारी गरेको हो । एन्फा अध्यक्ष पंकज विक्रम नेम्बाङले दायर गरेको रिटमा उक्त आदेश भएको हो । अदालतले रिटको अन्तिम टुंगो नलागेसम्म विदेश यात्रामा अवरोध नगर्न आदेशमा भनेको छ ।

विदेश भ्रमण रोक्न राष्ट्रिय खेलकुद परिषद् (राखेप) लेखेको पत्र तत्काल कार्यान्वयन रोकिएको छ । राखेपको सिफारिसमा अध्यागमन विभागले एन्फाका अध्यक्ष नेम्बाङ, महासचिव किरण राईसहितका पदाधिकारीलाई विदेश भ्रमण रोक लगाइएको थियो । फिफा विश्वकपमा सहभागी हुन जान लागेका एन्फा अध्यक्ष नेम्बाङ र महासचिव किरण राईलाई अध्यागमनले त्रिभुवन अन्तर्राष्ट्रिय विमानस्थलबाटै फिर्ता पठाइएको थियो । उनीहरूविरुद्ध आर्थिक अनियमिततामा अख्तियारमा परेको उजुरीमा अनुसन्धान भइरहेको छ ।