काठमाडौं २१ असार । चितवन राष्ट्रिय निकुञ्जबाट निस्किएको जंगली हात्तीको आक्रमणमा भरतपुर महानगरपालिका–२३ बेलहट्टामा एक आमा र उनका चार वर्षीय छोराको मृत्यु भएको छ।

शनिबार राति आफ्नै घरमा बसिरहेका बेला अचानक आएको जंगली हात्तीले आक्रमण गर्दा २१ वर्षीया अशिका बोटे र उनका चार वर्षीय छोरा भरत बोटेको घटनास्थलमै मृत्यु भएको हो।

भरतपुर महानगरपालिका–२३ का वडा अध्यक्ष दीपक दवाडीका अनुसार निकुञ्जबाट बस्तीमा प्रवेश गरेको हात्तीले घरमै आक्रमण गर्दा आमा–छोराको ज्यान गएको हो। घटनापछि स्थानीयवासी त्रसित बनेका छन्।

घटनालगत्तै स्थानीय जनप्रतिनिधि, सुरक्षा निकाय तथा चितवन राष्ट्रिय निकुञ्ज कार्यालयका प्रतिनिधिबीच छलफल भएको छ। छलफलबाट जंगली हात्तीलाई तत्काल नियन्त्रणमा लिन आवश्यक पहल गर्ने, मृतकका परिवारलाई निकुञ्ज कार्यालयमार्फत तत्काल उचित राहत उपलब्ध गराउने, मृतकको घर पुनर्निर्माण गराउने तथा मानव–वन्यजन्तु द्वन्द्व न्यूनीकरणका लागि आवश्यक दीर्घकालीन तथा तत्कालीन उपायहरू कार्यान्वयन गर्ने सहमति भएको जनाइएको छ।

यस घटनाले निकुञ्ज आसपासका बस्तीमा मानव–वन्यजन्तु द्वन्द्व फेरि गम्भीर रूपमा देखिएको भन्दै स्थानीयले बस्तीको सुरक्षा सुनिश्चित गर्न र यस्ता घटना दोहोरिन नदिन प्रभावकारी व्यवस्थापनको माग गरेका छन्।