काठमाडौं २२ असार । नेपाली कांग्रेसको संस्थापनइतर समूहले आज (सोमबार) १४औँ महाधिवेशनबाट निर्वाचित केन्द्रीय कार्यसमितिका पदाधिकारी तथा केन्द्रीय सदस्यहरूको बैठक बोलाएको छ। आगामी १५औँ महाधिवेशनको तयारीलाई केन्द्रमा राख्दै समूहले पहिलोपटक औपचारिक रूपमा बैठक आयोजना गर्न लागेको हो।

बैठक काठमाडौंको चुनदेवीमा नवस्थापित सम्पर्क कार्यालयमा दिउँसो १ बजे बस्नेछ। निवर्तमान कार्यवाहक सभापति पूर्णबहादुर खड्काको सचिवालयका अनुसार खड्का नेतृत्वको समूहमा रहेका काठमाडौंमा उपलब्ध पूर्वपदाधिकारी र पूर्वकेन्द्रीय सदस्यहरूलाई बैठकमा सहभागी हुन निमन्त्रणा गरिएको छ।

गत शुक्रबार खड्काको गल्फुटारस्थित निवासमा शीर्ष नेताहरूबीच भएको छलफलले बैठक बोलाउने निर्णय गरेको थियो। त्यसअनुसार आजबाट चुनदेवीस्थित सम्पर्क कार्यालय पनि औपचारिक रूपमा सञ्चालनमा आउनेछ।

बैठकपछि नेता मीन विश्वकर्माले सम्पर्क कार्यालय नै आगामी १५औँ महाधिवेशनको तयारी, रणनीतिक छलफल, बैठक तथा संगठन विस्तारका गतिविधिको केन्द्र बन्ने बताएका थिए। उनका अनुसार सम्पर्क कार्यालयमार्फत पार्टीभित्र सम्पर्क, सम्बन्ध विस्तार र संगठन सुदृढीकरणका कार्यक्रम सञ्चालन गरिनेछ।

विश्वकर्माले सातै प्रदेशमा संस्थापनइतर समूहका भेलाहरू सम्पन्न भइसकेको जानकारी दिँदै अब राष्ट्रिय भेला आयोजना गर्ने तयारी अन्तिम चरणमा पुगेको बताए। प्रदेश भेलाहरूमा गत निर्वाचनमा कांग्रेसले व्यहोरेको अप्रत्याशित पराजय, त्यसको समीक्षा तथा पार्टीभित्रको एकतालाई मजबुत बनाउने विषयमा व्यापक छलफल भएको उनको भनाइ छ।

आजको बैठकले राष्ट्रिय भेलाको मिति तय गर्ने अपेक्षा गरिएको छ। संस्थापनइतर समूहले उक्त भेलामार्फत आगामी महाधिवेशनको रणनीति, संगठन सुदृढीकरण र नेतृत्व चयनका विषयमा साझा धारणा निर्माण गर्ने तयारी गरेको छ। बैठकलाई कांग्रेसभित्र आगामी नेतृत्व प्रतिस्पर्धा र महाधिवेशनको शक्ति–सन्तुलन निर्धारण गर्ने महत्वपूर्ण राजनीतिक कदमका रूपमा समेत हेरिएको छ।