काठमाडौं, २४ असार। मकवानपुरको मनहरी गाउँपालिका–७ रमनटारस्थित पूर्व–पश्चिम राजमार्गमा वीरगञ्जबाट लमजुङतर्फ जाँदै गरेको यात्रुवाहक बस दुर्घटना हुँदा पाँच जना घाइते भएका छन्।

गएराति ना ५ ख ५३१९ नम्बरको बस दुर्घटनामा परेको प्रहरीले जनाएको छ। बसमा सवार १६ यात्रुमध्ये पाँच जना घाइते भएका हुन्। घाइतेहरूको उद्धार गरी प्रारम्भिक उपचारका लागि मनहरी अस्पताल लगिएको थियो। थप उपचार आवश्यक भएपछि उनीहरूलाई चितवन रिफर गरिएको छ।

दुर्घटनामा बस चालक सर्लाहीका ३९ वर्षीय भीमबहादुर बिक, चितवन भरतपुर–४ का ३० वर्षीय संजय तामाङ, पर्साको परवानीपुरका ५४ वर्षीय मोहम्मद आजाद, बाराको देवताल–१ का २३ वर्षीय राजकुमार राम तथा भारतको मोतिहारी निवासी २५ वर्षीय सुदिर कुमार घाइते भएका छन्।

प्रहरीले दुर्घटनाको कारणबारे अनुसन्धान सुरु गरेको जनाएको छ।