काठमाडौं २५ असार । नागार्जुनस्थित नामग्याल विद्यालयमा १४औँ दलाई लामाको ९१औँ जन्मदिन मनाइएको तथा उक्त कार्यक्रममा विदेशी नियोगका प्रतिनिधिहरूको सहभागिता रहेको विषयप्रति चीनका लागि नेपालका पूर्वराजदूतहरूले गम्भीर चासो व्यक्त गर्दै सरकारले अवलम्बन गर्दै आएको ‘एक चीन नीति’ दृढतापूर्वक कार्यान्वयन गर्न आग्रह गरेका छन्।

शुक्रबार संयुक्त प्रेस वक्तव्य जारी गर्दै पूर्वराजदूतहरू राजेश्वर आचार्य, महेश मास्के, महेन्द्र पाण्डे, लीलामणि पौडेल, टंक कार्की, विष्णु पुकार श्रेष्ठ र कृष्णप्रसाद ओली ले नेपालले चीनसँग कूटनीतिक सम्बन्ध स्थापना भएदेखि नै एक चीन नीतिप्रति प्रतिबद्ध रहँदै आएको स्मरण गराएका छन्। साथै नेपालको भूमिबाट कुनै पनि मित्रराष्ट्रविरुद्ध प्रतिकूल असर पर्ने गतिविधि हुन नदिने प्रतिबद्धता सरकारले पटक–पटक दोहोर्याएको उल्लेख गरेका छन्।

उनीहरूले हालै परराष्ट्रमन्त्री शिशिर खनालको चीन भ्रमणका क्रममा पनि यही प्रतिबद्धता पुनः व्यक्त गरिएको उल्लेख गर्दै, यदि उक्त कार्यक्रम सरकारको सहमतिमा भएको हो भने त्यसले नेपालले निरन्तर अवलम्बन गर्दै आएको एक चीन नीतिविपरीत सन्देश दिन सक्ने बताएका छन्।

संयुक्त वक्तव्यमा उनीहरूले प्रश्न उठाएका छन्, “नेपालले सधैं दृढतापूर्वक एक चीन नीति अपनाउँदै आएको, नेपालको भूमिबाट कुनै पनि मित्रराष्ट्रविरुद्ध प्रतिकूल असर पार्ने गतिविधि हुन नदिने प्रतिबद्धता व्यक्त गर्दै आएको र हालै चीन भ्रमणका क्रममा पनि दोहोर्याइएको प्रतिबद्धतामा परिवर्तन आएको हो? के हामीले छिमेकीसँगको परराष्ट्र नीति बदलेका हौं?”

पूर्वराजदूतहरूले यस्ता गतिविधिले नेपालले लामो समयदेखि कायम राख्दै आएको भूराजनैतिक सन्तुलनमा नकारात्मक असर पार्न सक्ने, साथै देशको स्थायित्व, विकास र स्वतन्त्रताका लागि समेत प्रत्युत्पादक हुन सक्ने चेतावनी दिएका छन्।

उनीहरूले भविष्यमा यस्ता गतिविधि नदोहोरिने सुनिश्चितता गर्न, छिमेकी मुलुकसँगको सम्बन्धमा उच्च संवेदनशीलता अपनाउन तथा नेपालको घोषित परराष्ट्र नीतिलाई व्यवहारमा दृढतापूर्वक कार्यान्वयन गर्न नेपाल सरकार र सम्बन्धित सबै पक्षलाई आग्रह गरेका छन्।