काठमाडौं — काठमाडौं महानगरपालिका–१० बुद्धनगरमा शनिबार बिहान एक व्यक्तिले आफ्नै घरमा आत्मदाहको प्रयास गरेका छन्। घटनामा गम्भीर घाइते भएका उनलाई प्रहरीले तत्काल उद्धार गरी वीर अस्पताल पुर्‍याएको छ।

जिल्ला प्रहरी परिसर काठमाडौंका प्रवक्ता एसपी पवन भट्टराईका अनुसार ४५ वर्षीय आश्विन राउतले बिहान करिब ६ः१५ बजे आफ्नै घरको भान्सा कोठामा शरीरमा आगो लगाएका थिए। स्थानीयको जानकारीपछि प्रहरी घटनास्थल पुगेर उनलाई उद्धार गरी उपचारका लागि वीर अस्पताल पठाएको हो।

प्रहरीका अनुसार राउतको शरीरको करिब ५० प्रतिशत भाग जलेको छ। उनको वीर अस्पतालमा उपचार भइरहेको छ भने स्वास्थ्य अवस्था चिकित्सकको निगरानीमा रहेको प्रहरीले जनाएको छ।

प्रारम्भिक अनुसन्धानमा घटनाका बेला राउत घरमा एक्लै रहेको खुलेको छ। उनी श्रीमती र छोरासँग बुद्धनगरमा बस्दै आए पनि आत्मदाहको प्रयास भएको समयमा श्रीमती र छोरा घरमा नरहेको प्रहरीले जनाएको छ।

घटनाको कारण भने अझै खुल्न सकेको छैन। प्रहरीका अनुसार राउतको आत्मदाह प्रयास किन भयो भन्ने विषयमा अनुसन्धान जारी छ।

प्रवक्ता भट्टराईले छिमेकीहरूको भनाइ उद्धृत गर्दै शुक्रबार राउत र उनका छोराबीच कुनै विषयमा छलफल भएको जानकारी प्राप्त भएको बताए। यद्यपि त्यसको घटनासँग प्रत्यक्ष सम्बन्ध छ वा छैन भन्ने विषयमा अहिले नै निष्कर्ष निकाल्न नसकिने उनले बताए।

प्रहरीले घटनाको वास्तविक कारण पत्ता लगाउन परिवारका सदस्य, छिमेकी तथा अन्य सम्बन्धित व्यक्तिसँग सोधपुछ गरिरहेको जनाएको छ।