काठमाडौँ – सरकारको काम कारबाहीको विषयलाई लिएर सत्तारुढ रास्वपाभित्रैबाट आलोचना हुन थालेपछि प्रतिनिधिसभाको बैठक दुई हप्ताका लागि स्थगित भएको छ।

बुधबार दिउँसो बसेको बैठक अब साउन १४ गते बस्ने गरी सभामुख डोलप्रसाद अर्यालले बोलाएका हुन्। रास्वपा नेता वालेन्द्र शाह नेतृत्वको सरकारले सय दिन पुरा गरेसँगै यसको काम कारबाहीको विषयलाई लिएर विपक्षी दलहरुले मात्रै होइन दलभित्रैबाट आलोचना बढ्न थालेको छ। सुकुम्बासी, सीमा विवाद, आत्मदाहा प्रकरणमा सरकारले गलत गरेको भन्दै विपक्षीको आवाजमा रास्वपाकै आवाज मिसिएपछि सरकार थप आलोचित हुन थालेको छ।

संसद बैठक रोक्ने विषयमा बुधबार कार्यव्यवस्था समितिमा पनि छलफल भएको थियो। कार्यव्यवस्थामा सांसदहरुले जिल्ला जान चाहेको र बिजनेसको कमी भएको भन्दै बैठक रोक्ने प्रस्ताव गरिएको थियो। सरकारको काम कारबाहीलाई लिएर रास्वपा सांसदहरु अमरेशकुमार सिंह, मनिष झा, क्रान्तिशिखा धिताल, प्रकाशचन्द्र परियार, करिष्मा कठरिया, सुलभ खरेललगायतले सार्वजनिक रुपमा आलोचना गर्न थालेका छन्।