काठमाडौं, २ साउन । राष्ट्रिय विपद् जोखिम न्यूनीकरण तथा व्यवस्थापन प्राधिकरणले मनसुन थप सक्रिय भई दुई दिनसम्म भारी वर्षाको सम्भावना रहेकाले सर्वसाधारणलाई अत्यावश्यक कामबाहेक शनिबार र आइतबार टाढाको तथा रातिको यात्रा नगर्न आग्रह गरेको छ।

गृह मन्त्रालयअन्तर्गतको प्राधिकरणले जारी गरेको सतर्कता सूचनाअनुसार भारी वर्षासँगै आकस्मिक बाढी, पहिरो, कटान, गेग्रान बहाव तथा सहरी र तराई क्षेत्रमा डुबानको उच्च जोखिम रहेकाले सबै सरोकारवाला निकायलाई उच्च सतर्कता अपनाउन निर्देशन दिइएको हो।

प्राधिकरणले ललितपुरसहित २३ जिल्लामा रातिको समयमा सवारीसाधन सञ्चालनमा रोक लगाउन सम्बन्धित निकायलाई निर्देशन दिएको छ। प्रभावित जिल्लामा पाँचथर, इलाम, झापा, संखुवासभा, तेह्रथुम, भोजपुर, खोटाङ, धनकुटा, सिन्धुली, ललितपुर, काभ्रे, सिन्धुपाल्चोक, नुवाकोट, चितवन, धादिङ, गोरखा, लमजुङ, कास्की, तनहुँ, पर्वत, बागलुङ, म्याग्दी र स्याङ्जा रहेका छन्। आवश्यक परे जुनसुकै बेला सवारी आवागमन पूर्ण रूपमा बन्द गर्न पनि निर्देशन दिइएको छ।

प्राधिकरणले तीनवटै सुरक्षा निकाय, स्थानीय तह र स्वयंसेवकलाई उद्धार तथा प्रतिकार्यका लागि तयारी अवस्थामा रहन, जोखिमयुक्त सडकमा डोजर, एक्साभेटर र लोडरजस्ता उपकरण तयारी अवस्थामा राख्न तथा जोखिममा रहेका बस्तीका बासिन्दालाई समयमै सुरक्षित स्थानमा स्थानान्तरण गर्न आग्रह गरेको छ।

खोला–नदी किनार, खहरे, पहिरोको जोखिम भएका क्षेत्र तथा डुबान प्रभावित बस्तीका नागरिकलाई विशेष सतर्कता अपनाउन पनि अनुरोध गरिएको छ।

प्राधिकरणले वर्षा र बाढीसम्बन्धी जानकारीका लागि ११५५, विपद् सहायता १२३४, नेपाल प्रहरी १०० र सशस्त्र प्रहरी बल १११४ हटलाइन नम्बर प्रयोग गर्न तथा जल तथा मौसम विज्ञान विभाग र प्राधिकरणबाट जारी हुने अद्यावधिक पूर्वसूचना तथा चेतावनी नियमित रूपमा पछ्याउन आग्रह गरेको छ।