काठमाडौं, ११ साउन । देशका पूर्वी र मध्य भेगका धेरै ठाउँमा रातभर झरी परेको छ । अरु ठाउँको तुलनामा कास्की, लमजुङ, पाल्पा, बाग्लुङ, नवलपरासी, मकवानपुर, काभ्रे, तनहुँ, सर्लाही, म्याग्दी लगायतका जिल्लामा ठूलो पानी परेको मौसम पूर्वानुमान महाशाखाले जनाएको छ ।

महाशाखाका अनुसार बागमती र गण्डकी प्रदेशका धेरै ठाउँमा, लुम्बिनी र कोशी प्रदेशका थोरै ठाउँमा तथा मधेश, कर्णाली र सुदूरपश्चिम प्रदेशका एक–दुई ठाउँमा हल्कादेखि मध्यम वर्षा भइरहेको छ ।

यसैबीच बाढी पूर्वानुमान महाशाखाले तनहुँको कोटागाउँ र आसपासका क्षेत्र, काभ्रेको रोशी खोला आसपासका क्षेत्र, काभ्रेकै पाँचखाल, मण्डन र सिन्धुपालञ्चोक साँगाचोक र आसपासका क्षेत्र, सर्लाहीको मनुसमारा र आसपासका क्षेत्र, काठमाण्डौको बागमती र बिष्णुमती आसपासका क्षेत्र तथा भक्तपुरको हनुमन्तेखोला आसपासका क्षेत्रमा बाढीको जोखिम रहेकाले सतर्कता अपनाउन आग्रह गरेको छ ।

रातभर पानी परिरहे पनि काठमाण्डौ जोड्ने मुख्य नाका नागढुंगा–मुग्लिन सडकखण्ड सामान्य रहेको मुग्लिन प्रहरीले जनाएको छ ।

आज दिउँसो र बेलुकीपख पनि केही ठाउँमा मुसलधारे वर्षाको सम्भावना रहेको मौसम पूर्वानुमान महाशाखाले जनाएको छ । महाशाखाका अनुसार आज दिउँसो कर्णाली प्रदेशको पहाडी भेग तथा लुम्बिनी र सुदूरपश्चिम प्रदेशको पहाडी र तराई भेगका एक–दुई ठाउँमा मुसलधारे वर्षाको सम्भावना छ ।