काठमाडौं । नेपाली कांग्रेसका नेता नैनसिंह महरले पार्टीभित्र बढ्दो आन्तरिक विवाद अन्त्य गर्दै संगठनलाई सुदृढ बनाउन ‘देश र कांग्रेस जोड्ने अभियान’ घोषणा गरेका छन्।

आइतबार काठमाडौंमा आयोजित पत्रकार सम्मेलनमा उनले साउन २० गते राष्ट्रिय भेला आयोजना गरिने जानकारी दिए। सुकेधारास्थित मिराकल पार्टी प्यालेसमा हुने उक्त भेलामा देशभरका ७५३ स्थानीय तह, ३३० प्रदेश निर्वाचन क्षेत्र, १६५ संघीय निर्वाचन क्षेत्रका प्रतिनिधिसहित करिब दुई हजार जनाको सहभागिता रहने जनाइएको छ।

महरले आन्तरिक किचलोका कारण कांग्रेस जनताका मुद्दाबाट टाढिँदै गएको भन्दै पार्टीलाई एकताबद्ध बनाउन दबाबमूलक अभियान सुरु गरिएको बताए। देश जटिल परिस्थितिबाट गुज्रिरहेका बेला प्रमुख प्रतिपक्ष आफैं विभाजित हुनु दुर्भाग्यपूर्ण भएको उनको भनाइ थियो।

उनले सुनसरीबाट सुरु भई मधेस प्रदेशका विभिन्न जिल्लामा फैलिएको साम्प्रदायिक तनावप्रति चिन्ता व्यक्त गर्दै हिंसामा ज्यान गुमाएकाप्रति श्रद्धाञ्जली अर्पण गरे। घाइतेको उपचार र पीडितलाई क्षतिपूर्तिको व्यवस्था गर्न सरकारसँग मागसमेत गरे।

अभियानले कांग्रेसको १५औँ महाधिवेशन निष्पक्ष, पारदर्शी र धाँधलीरहित बनाउन अनुशासन समिति, निर्वाचन समिति र सदस्यता छानबिन समितिमा सबै पक्षको सर्वसम्मत प्रतिनिधित्व सुनिश्चित गर्नुपर्ने माग अघि सारेको छ।

महरले पार्टी सभापति तथा पदाधिकारीहरूलाई व्यक्तिगत अहम् त्यागेर संगठन एकताबद्ध बनाउन आग्रह गर्दै आवश्यक परे आफूहरू केन्द्रीय सदस्य पदबाट समेत हट्न तयार रहेको बताए।

अभियानले राष्ट्रिय भेलापछि देशभर हस्ताक्षर संकलनसहित थप दबाबमूलक कार्यक्रम सञ्चालन गर्ने जनाएको छ। महरले “कांग्रेस जुट्दा लोकतन्त्र बलियो हुन्छ, लोकतन्त्र बलियो भए मात्र देश बलियो हुन्छ” भन्ने संकल्पसहित अभियान अघि बढाइएको बताए।

Originally published on abcnews.com.np.