काठमाडौं । पश्चिम नवलपरासीको सुस्ता गाउँपालिका–५ मा नारायणी नदीको कटान रोक्न स्थानीयले निर्माण गरेको अस्थायी बाँध भत्काउन भारतीय सीमा सुरक्षा बल (एसएसबी) पुगेपछि केही समय तनाव उत्पन्न भएको छ।

स्थानीयका अनुसार सादा पोसाकमा आएका भारतीय सुरक्षाकर्मीले करिब १०० मिटर लामो बाँध भत्काउन थालेपछि स्थानीयले प्रतिकार गरेका थिए। केहीबेर तनावको अवस्था सिर्जना भए पनि अहिले स्थिति सामान्य रहेको बताइएको छ।

सुस्ता बचाऊ अभियानका प्रवक्ता रवीन्द्र जयसवालका अनुसार बाढीबाट गाउँ जोगाउन स्थानीयले माटो भरेर अस्थायी बाँध निर्माण गरेका थिए। भारतीय पक्षले उक्त बाँध विवादित क्षेत्रमा बनेको दाबी गर्दै नेपाली भूमिमै प्रवेश गरेर भत्काउन खोजेपछि स्थानीयले विरोध गरेका हुन्।

यता, प्रमुख जिल्ला अधिकारी दीपकराज नेपालले भने सीमावर्ती क्षेत्रमा स्थानीयले अस्थायी बाँध निर्माण गर्न थालेपछि भारतीय सुरक्षा निकाय बुझ्न आउँदा सामान्य विवाद भएको बताएका छन्।

यसअघि पनि नारायणी नदी नियन्त्रणका लागि निर्माण हुन लागेको १३२ मिटर लामो तटबन्धमा भारतीय पक्षले अवरोध गरेपछि काम रोकिएको थियो। अहिले त्यही स्थानबाट बाढीको जोखिम बढेपछि स्थानीयले आफ्नै पहलमा अस्थायी बाँध बनाएका थिए।

सुस्तामा हालसम्म स्थायी सीमा स्तम्भ नरहेको र सीमाको विषयमा नेपाल–भारतबीच लामो समयदेखि विवाद रहँदै आएको छ। स्थानीयका अनुसार पहिले सिमलको रुखलाई सीमा मान्ने सहमति भए पनि पछिल्लो समय भारतीय पक्षले कदमको रुखलाई आधार मान्दै आएको छ।

प्रमुख जिल्ला अधिकारी नेपालले दुवै पक्षबीच छलफलमार्फत समस्या समाधान गर्ने प्रयास भइरहेको जानकारी दिएका छन्।

Originally published on abcnews.com.np.