बागलुङ । पश्चिम बागलुङको बुर्तिबाङ बजार क्षेत्रमा शान्ति सुरक्षा बिग्रँदै गएको, प्रहरी हिरासतमा नागरिकमाथि कुटपिट हुने गरेको र सामाजिक विकृति बढेको भन्दै सात राजनीतिक दलले विरोध जनाएका छन् ।
सोमबार क्रियाशील सात दलका केन्द्रीय तथा स्थानीय नेताहरूले संयुक्त प्रेस विज्ञप्ति जारी गर्दै ज्यादती अझै बढे चरणबद्ध आन्दोलन गर्ने चेतावनी दिएका हुन् ।
प्रहरी कुटपिट र सामाजिक विकृतिमा दलको आपत्ति
विज्ञप्तिमा प्रहरीले अनुसन्धानका नाममा निर्दोष नागरिकलाई हिरासतमा निर्मम कुटपिट गरी मानव अधिकार उल्लंघन गरेको आरोप लगाइएको छ ।
त्यसैगरी बुर्तिबाङ बजारमा जुवातास, मदिरा र लागुऔषधको प्रयोग बढेको, जथाभावी गाडी पार्किङ गर्ने गरिएको र तीव्र गति तथा हर्नले बजार अस्तव्यस्त बन्दासमेत स्थानीय सरकार र प्रहरी प्रशासन चुप लागेर बसेको दलहरूको गुनासो छ ।
दलहरूले प्रहरी हिरासतमा हुने कुटपिट तत्काल रोक्न, लागुऔषध र जुवातास नियन्त्रण गर्न, बजार अनुगमन र ट्राफिक व्यवस्थापन सुधार गर्न माग गरेका छन् । समस्याहरू तत्काल समाधान नगरे चरणबद्ध आन्दोलनमा उत्रिने उनीहरूले चेतावनी दिएका छन् ।
साम्प्रदायिक हिंसाप्रति दुःख
उनीहरूले हालै तराईका सुनसरी र धनुषामा भएका साम्प्रदायिक दङ्गामा तीन जना युवाले ज्यान गुमाउनुपरेको घटनाप्रति दुःख व्यक्त गर्दै दोषीलाई कडा कारबाही गर्न माग गरेका छन् ।
विज्ञप्ति जारी गर्नेहरूमा नेपाली कम्युनिस्ट पार्टीका केन्द्रीय सदस्य निलबहादुर पुन, नेपाली कांग्रेस बागलुङ क्षेत्र नं. २ (ख) का सभापति मेषलाल शर्मा, नेकपा (एमाले) का गण्डकी प्रदेश सदस्य टंकप्रसाद पौडेल, जनता समाजवादी पार्टी नेपालका केन्द्रीय सदस्य गंगबहादुर घर्ती, क्रान्तिकारी कम्युनिस्ट पार्टी नेपालका वैकल्पिक केन्द्रीय सदस्य तिलक बुढा, राष्ट्रिय जनमोर्चाका जिल्ला सदस्य तमबहादुर घर्ती र नेकपा (माओवादी) का जिल्ला सदस्य शिवध्वज पुन रहेका छन् ।
Originally published on abcnews.com.np.
प्रतिक्रिया दिनुहोस्