काठमाडौं । नेपाल स्की संघले आर्थिक वर्ष २०८३/८४ का लागि ३४ लाख ८० हजार ८ सय रुपैयाँको वार्षिक बजेट पारित गरेको छ ।

संघको सातौँ साधारणसभाले राष्ट्रिय प्रतियोगिता आयोजना, अन्तर्राष्ट्रिय प्रतियोगिता तथा कार्यक्रममा सहभागिता, प्रशिक्षण कार्यक्रम र विन्टर ओलम्पिक्सको तयारीका लागि उक्त बजेट पारित गरेको हो ।

साधारणसभामा संघकी उपाध्यक्ष रमा भट्टराईले आगामी कार्ययोजना प्रस्तुत गरेकी थिइन् । महासचिव विजय श्रेष्ठले वार्षिक प्रतिवेदन र कोषाध्यक्ष जितेन्द्र श्रेष्ठले आर्थिक प्रतिवेदन प्रस्तुत गरेका थिए । साधारणसभाले कार्ययोजना तथा दुवै प्रतिवेदन सर्वसम्मत रूपमा पारित गरेको संघले जनाएको छ ।

साधारणसभाले नयाँ लेखापरीक्षक नियुक्त गर्नुका साथै आगामी वर्ष नियमित साधारणसभा आयोजना गर्ने निर्णयसमेत गरेको छ । संघले बीआर पराजुली एन्ड एसोसिएट्सलाई लेखापरीक्षकमा नियुक्त गरेको जनाएको छ ।

साधारणसभामा संघका पदाधिकारी तथा सदस्यहरूको भौतिक र भर्चुअल माध्यमबाट सहभागिता रहेको थियो ।

Originally published on abcnews.com.np.