काठमाडौं । राष्ट्रिय स्वतन्त्र पार्टी (रास्वपा)का सभापति एवं पूर्वउपप्रधानमन्त्री रवि लामिछानेले सरकारले आफ्नो लक्ष्य र प्रतिबद्धताअनुसार काम गर्न नसके पार्टीले हस्तक्षेप गर्ने बताएका छन्।

सरकारको कार्यशैलीबारे टिप्पणी गर्दै लामिछानेले सरकार आफ्नो बाटोबाट विचलित भए राजनीतिक दलका रूपमा त्यसलाई सही मार्गमा ल्याउने क्षमता रास्वपासँग रहेको दाबी गरे। उनले सरकार अहिले नै असफल नभएको र त्यस्तो अवस्था आउन नदिने बताए।

“सरकारले आफ्नो वाचा र लक्ष्यअनुसार काम गर्छ। काम गर्न सकेन वा बाटो बिरायो भने सरकारलाई सही बाटोमा ल्याउने राजनीतिक पार्टी हामीसँग छ,” उनले भने, “आवश्यक परे जतिखेर पनि सरकारलाई कान समातेर सच्याउन सक्ने क्षमता पार्टीले राख्छ। तर अहिले त्यो अवस्था आएको छैन, आउन पनि दिँदैनौँ।”

सरकार सञ्चालनलाई हवाई उडानसँग तुलना गर्दै लामिछानेले कहिलेकाहीँ प्राविधिक समस्या वा बाह्य कारणले आउने ‘टर्बुलेन्स’बाट आत्तिन नहुने बताए। उनले सरकारलाई निर्धारित गन्तव्यमा पुर्‍याउन आफूहरू प्रतिबद्ध रहेको बताए।

चार महिनामा परिवर्तनको संकेत देखिनुपर्थ्यो

लामिछानेले सरकार गठन भएको चार महिना बितिसक्दा पनि जनअपेक्षाअनुसार परिवर्तनको स्पष्ट आभास देखिन नसकेको स्वीकार गरे।

उनले चार महिना नै सरकारको पूर्ण मूल्याङ्कन गर्ने पर्याप्त समय नभए पनि यस अवधिमा केही सकारात्मक परिवर्तनको संकेत देखिनुपर्ने बताए। नागरिकका सुझाव र गुनासालाई पार्टीले नजिकबाट सुनिरहेको भन्दै उनले वर्तमान अवस्थाप्रति चिन्तित नहुन आग्रह गरे।

रास्वपामा समाज परिवर्तनको हुटहुटी भएका युवा तथा गैरराजनीतिक पृष्ठभूमिका व्यावसायिक व्यक्तिहरूको ठूलो समूह रहेको लामिछानेले बताए। उनले असहज परिस्थितिलाई सम्हाल्न सक्ने राजनीतिक नेतृत्व र जिम्मेवारी पार्टीसँग रहेको दाबी गरे।

“अप्ठ्यारो परिस्थितिलाई सम्हाल्न सक्ने राजनीतिक नेतृत्व र जिम्मेवारी हाम्रो पार्टीसँग छ। किनकि यो पार्टीमा केही गरौँ भन्ने हुटहुटी भएका युवाहरू छन्,” उनले भने।

लामिछानेले वर्तमान सरकार नागरिककै सरकार भएको उल्लेख गर्दै इतिहासले सुम्पिएको जिम्मेवारी जनतासँगको सहकार्यमा सफल बनाउने प्रतिबद्धता व्यक्त गरे।

Originally published on abcnews.com.np.