काठमाडौं । २० वर्षमुनिका प्रतिभावान युवालाई लक्षित गर्दै चौथो युवा सर्ट फिल्म फेस्टिभलका लागि आवेदन आह्वान गरिएको छ। अस्कर कलेज र चलचित्र विकास बोर्डले संयुक्त रूपमा फेस्टिभल आयोजना गर्न लागेका हुन्।

प्रतियोगितामा सहभागी हुने सर्ट फिल्मको अवधि न्यूनतम ८ मिनेटदेखि अधिकतम १५ मिनेटसम्म हुनुपर्ने आयोजकले जनाएको छ। इच्छुक प्रतियोगीले आगामी भदौ ८ गतेभित्र आफ्नो चलचित्र बुझाउनुपर्नेछ।

प्रतियोगितामा प्रथम हुनेले १ लाख रुपैयाँ, द्वितीय हुनेले ५० हजार रुपैयाँ र तृतीय हुनेले २५ हजार रुपैयाँ नगद पुरस्कार प्राप्त गर्नेछन्।

त्यसैगरी, पुरस्कार विजेतामध्ये अस्कर कलेजमा अध्ययन गर्न इच्छुकलाई ५० प्रतिशत छात्रवृत्ति उपलब्ध गराइने आयोजकले जनाएको छ।

प्रतियोगितामा सहभागी चलचित्रमध्ये उत्कृष्ट फिल्महरू फेस्टिभलमा प्रदर्शन गरिनेछन्। विजेताको घोषणा तथा पुरस्कार वितरण कार्यक्रम भदौ १५ गते आयोजना गरिनेछ।

युवा पुस्तामा चलचित्र निर्माणप्रतिको रुचि, सिर्जनशीलता र प्रतिभालाई प्रोत्साहन गर्ने उद्देश्यले फेस्टिभल आयोजना गर्न लागिएको आयोजकले जनाएको छ।

Originally published on abcnews.com.np.