काठमाडौं । हिमालयन अर्गनाइजेशनअन्तर्गतको आयाम इन्टरकन्टिनेन्टलले चिनियाँ अटोमोबाइल कम्पनी डोङफेङ ब्रान्डका विद्युतीय बस नेपाली बजारमा भित्र्याउने भएको छ।

कम्पनीका अनुसार आगामी भदौ २६ गतेदेखि काठमाडौंको भृकुटीमण्डपमा आयोजना हुने ‘नाइमा मोबिलिटी एक्सपो २०२६’ मार्फत डोङफेङका विद्युतीय बस नेपाली बजारमा औपचारिक रूपमा सार्वजनिक गरिनेछ।

१२ मिटरका दुई मोडलबाट सुरुवात

आयाम इन्टरकन्टिनेन्टलले पहिलो चरणमा १२ मिटर लम्बाइका २६ देखि ३० सिट क्षमताका दुईवटा विद्युतीय बस मोडल बजारमा ल्याउने तयारी गरेको छ।

त्यसपछि ९ र १२ मिटर लम्बाइका क्रमशः ३८ र ५२ सिट क्षमताका थप ठूला बससमेत नेपाली बजारमा ल्याउने कम्पनीको योजना छ।

डोङफेङका बसको विस्तृत प्राविधिक विशेषता, ब्याट्री क्षमता, रेन्ज तथा मूल्य एक्सपोका क्रममा सार्वजनिक गरिने कम्पनीले जनाएको छ।

एक्सपोमा बुकिङ गर्नेलाई विशेष छुट

कम्पनीले नेपाली बजारमा उपलब्ध सोही श्रेणीका अन्य विद्युतीय बससँग प्रतिस्पर्धा गर्न सक्ने गरी डोङफेङका बसको मूल्य निर्धारण गर्ने जनाएको छ।

एक्सपो अवधिभर बस बुकिङ गर्ने ग्राहकका लागि विशेष छुट तथा अन्य आकर्षक सुविधा उपलब्ध गराउने तयारीसमेत गरिएको कम्पनीले जनाएको छ।

देशभर बिक्रीपछिको सेवा

डोङफेङका विद्युतीय बसको बिक्रीपछिको सेवा प्रभावकारी बनाउन आयाम इन्टरकन्टिनेन्टलले हिमालयन अर्गनाइजेशनको देशव्यापी सञ्जाल प्रयोग गर्ने भएको छ।

कम्पनीका अनुसार देशभर रहेका शाखा तथा डिलरमार्फत ग्राहकलाई स्पेयर पार्ट्स, मर्मत तथा आवश्यक प्राविधिक सेवा उपलब्ध गराइनेछ।

विद्युतीय सार्वजनिक यातायातको प्रयोग बढ्दै गएको अवस्थामा डोङफेङका बसको प्रवेशले नेपाली बजारमा विद्युतीय बसको विकल्प थप फराकिलो हुने अपेक्षा गरिएको छ।

Originally published on abcnews.com.np.