सर्लाही । सर्लाहीको बरहथवा नगरपालिका–९, मुर्तियामा ‘नाम नखुलेको किरा’ले टोकेको भनिएका एक युवकको मृत्यु भएको छ।

मृत्यु हुनेमा स्थानीय ३५ वर्षीय रामपृत महतो रहेका छन्। आइतबार दिउँसो आफ्नै घरमा रहेका बेला महतोलाई दाहिने खुट्टामा कुनै किराले टोकेको परिवारले जनाएको छ।

किराले टोकेपछि गम्भीर बिरामी भएका महतोलाई आफन्तले उपचारका लागि वीरगञ्जस्थित नारायणी अस्पताल पुर्‍याएका थिए। तर, अस्पताल पुर्‍याउँदा चिकित्सकले उनलाई मृत घोषणा गरेका हुन्।

जिल्ला प्रहरी कार्यालय सर्लाहीका डीएसपी वेदप्रसाद गौतमका अनुसार महतोलाई के ले टोकेको भन्ने यकिन भएको छैन। परिवारले टोक्ने जनावर नदेखेकाले किराले टोकेको बताएको प्रहरीको भनाइ छ। प्रहरीले विषालु सर्पले टोकेको हुनसक्ने आशंका गरेको छ।

घटनाबारे जानकारी पाएपछि इलाका प्रहरी कार्यालय मुर्तियाबाट प्रहरी नायब निरीक्षक कृष्ण आचार्यको नेतृत्वमा प्रहरी टोली घटनास्थलमा पुगेको थियो। प्रहरीले घटनाबारे थप अनुसन्धान गरिरहेको जनाएको छ।

Originally published on abcnews.com.np.