काठमाडौं — जनता समाजवादी पार्टी (जसपा), नेपालका सांसद महन्थ ठाकुरले समाजमा बढ्दै गएको धार्मिक असहिष्णुताप्रति चिन्ता व्यक्त गर्दै सामाजिक सद्भाव कायम गर्न कानुनी र नैतिक आधार बलियो बनाउनुपर्ने बताएका छन्।

सोमबार संघीय संसद्को विकास, आर्थिक मामिला तथा सुशासन समितिको बैठकमा ‘राष्ट्रिय सदाचार नीति, २०८३’ को कार्यान्वयन सम्बन्धमा भएको छलफलमा बोल्दै ठाकुरले धार्मिक तथा सामाजिक विविधताबीच सहिष्णुता कायम गर्न राज्य र नागरिक दुवै जिम्मेवार हुनुपर्नेमा जोड दिए।

उनले नेपालको विविधतापूर्ण समाजमा एउटा समुदायका धार्मिक गतिविधि, जुलुस वा नाराबाजी अर्को समुदायका लागि असहज बन्ने गरेको उल्लेख गरे। धर्मका नाममा हुने विवादको मूल कारण मानवीय नैतिकताको अभाव भएको उनको तर्क थियो।

‘एक समाजको मठ–मन्दिर अगाडि अर्को समाजको जुलुस जाँदा कतिपय अवस्थामा सहिष्णुता देखिए पनि, कतिपय अवस्थामा फरक नारा र धार्मिक मान्यताका कारण टकराव हुने गरेको छ,’ ठाकुरले भने, ‘यस्तो असहिष्णुताले समाजमा मारकाट र द्वन्द्व निम्त्याउने गरेको छ।’

धर्मभन्दा माथि नैतिकता आवश्यक

ठाकुरले धर्मका नाममा हुने विवादमा नैतिकताको प्रश्नलाई केन्द्रमा राख्नुपर्ने बताए। भगवानको नाममा हुने झगडासमेत मानवीय नैतिकता र सामाजिक मर्यादाको अभावकै परिणाम भएको उनको भनाइ थियो।

‘नैतिकता मानिसको बीचमा हुनुपर्ने विषय हो,’ उनले भने।

पछिल्लो समय पाठ्यक्रमबाट नैतिक शिक्षा हटाइनु दुःखद् भएको उल्लेख गर्दै ठाकुरले शिक्षाले नागरिकमा नैतिक मूल्य र सामाजिक उत्तरदायित्व विकास गर्नुपर्ने बताए।

उनले समाजमा न्याय र व्यवस्था कायम राख्न कानुनी आधार अनिवार्य रहेको धारणा राखे।

‘यदि समाजमा कानुनी आधार रहन्छ भने मात्र पीडितले न्यायका लागि पहल गर्न सक्छन्, अन्यथा समाज अराजकतातर्फ धकेलिन्छ,’ उनले भने।

‘सहनशील संस्कृतिलाई कमजोरी नठानौँ’

नेपालको संस्कृतिलाई ‘प्यासिभ’ अर्थात् सहनशील संस्कृतिका रूपमा चित्रण गर्दै ठाकुरले सहिष्णुता नेपाली समाजको कमजोरी नभएको बताए।

विविध धर्म, भाषा, जातजाति र समुदायबीच सहअस्तित्व कायम राख्न सहिष्णु संस्कृतिलाई थप बलियो बनाउनुपर्ने उनको भनाइ थियो।

सामाजिक सद्भाव र शान्ति कायम गर्न सरकारले कडा कानुनी व्यवस्था तथा दण्ड–सजायको प्रभावकारी प्रबन्ध गर्नुपर्ने सुझावसमेत उनले दिए।

ठाकुरका अनुसार राष्ट्रिय सदाचार नीतिको प्रभावकारी कार्यान्वयनले सार्वजनिक जीवनमा नैतिकता र उत्तरदायित्व बढाउनुका साथै सुशासन, सामाजिक सद्भाव र कानुनी शासनलाई बलियो बनाउन सहयोग पुर्‍याउन सक्छ।

Originally published on abcnews.com.np.