काठमाडौं — माउन्टेन इनर्जी लिमिटेडको सहायक कम्पनीमार्फत मनाङमा निर्माण हुन लागेको ६५ मेगावाट क्षमताको दूधखोला जलविद्युत् आयोजनाको वित्तीय व्यवस्थापन सम्पन्न भएको छ।

आयोजना प्रवर्द्धक दूधखोला हाइड्रोपावर कम्पनी प्रालि र बैंकहरूबीच वित्तीय व्यवस्थापनसम्बन्धी सम्झौतामा हस्ताक्षर भएसँगै आयोजनाको निर्माणका लागि आवश्यक ऋण व्यवस्थापन टुंगिएको हो।

सम्झौताअनुसार आयोजनामा एनएमबि बैंकले ६ अर्ब ८१ करोड रुपैयाँ र सानिमा बैंकले ३ अर्ब २० करोड रुपैयाँ लगानी गर्नेछन्। यसअनुसार दुई बैंकको कुल लगानी १० अर्ब १ करोड रुपैयाँ हुनेछ।

मनाङमा निर्माण हुने आयोजनाको कुल अनुमानित लागत १२ अर्ब ८९ करोड रुपैयाँ रहेको छ। कुल लागतलाई आयोजनाको क्षमतासँग तुलना गर्दा प्रतिमेगावाट लागत २० करोड रुपैयाँभन्दा कम हुने भएकाले आयोजनालाई तुलनात्मक रूपमा आकर्षक मानिएको छ।

बैंकबाट प्राप्त हुने ऋणबाहेकको बाँकी रकम प्रवर्द्धक कम्पनीले लगानी गर्नेछ।

वित्तीय व्यवस्थापन सम्पन्न भएसँगै आयोजनाको निर्माण प्रक्रिया अघि बढाउने तयारी गरिएको छ। कम्पनीले निर्माण सुरु भएको तीन वर्षभित्र विद्युत् उत्पादन थाल्ने लक्ष्य राखेको जनाएको छ।

दूधखोला जलविद्युत् आयोजनाले मनाङमा जलविद्युत् उत्पादन विस्तारसँगै स्थानीय पूर्वाधार र रोजगारीमा समेत योगदान पुर्‍याउने अपेक्षा गरिएको छ।

माउन्टेन इनर्जीको अनुभव

आयोजना प्रवर्द्धक माउन्टेन इनर्जी लिमिटेडले यसअघि ४२ मेगावाटको मिस्ट्रीखोला जलविद्युत् आयोजना र ५ मेगावाटको ताँदीखोला जलविद्युत् आयोजना निर्माण गरिसकेको छ। दुवै आयोजना सञ्चालनमा रही नियमित रूपमा विद्युत् उत्पादन गरिरहेका छन्।

यसअघि निर्माण तथा सञ्चालनमा ल्याइसकेका आयोजनाको अनुभवलाई आधार बनाउँदै ६५ मेगावाटको दूधखोला आयोजनालाई पनि समयमै सम्पन्न गर्ने लक्ष्य कम्पनीले अघि सारेको छ।

Originally published on abcnews.com.np.