काठमाडौँ । नेपाली कांग्रेसका नेता नारायणप्रकाश साउदले पार्टीभित्र विशेष अधिवेशनको माग गरिरहेका नेताहरूलाई पार्टी विभाजनको बाटोमा नजान आग्रह गरेका छन्।

सोमबार काठमाडौँमा नेपाली कांग्रेस सिन्धु–काठमाडौँले आयोजना गरेको कार्यक्रममा बोल्दै साउदले आन्तरिक मतभेद बिर्सेर पार्टी एकतामा जोड दिनुपर्ने बताएका हुन्।

सर्वोच्च अदालतले अदालतमा विचाराधीन मुद्दाको सन्दर्भमा डिभिजन बेन्चको फैसलामाथि पुनरावलोकन गर्ने निर्णय गरेको उल्लेख गर्दै साउदले यसलाई विशेष अधिवेशनको माग गरिरहेका नेताहरूका लागि ‘सच्चिने अवसर’ का रूपमा व्याख्या गरे।

उनले १४औँ महाधिवेशनबाट निर्वाचित केन्द्रीय समितिमा विशेष अधिवेशनको नेतृत्व गरिरहेका नेताहरूको समेत सहभागिता र महत्वपूर्ण जिम्मेवारी रहेको स्मरण गराए।

वर्तमान केन्द्रीय समितिकै आयोजनामा १५औँ महाधिवेशन सम्पन्न गर्न सहयोग गरे मात्रै पार्टी एकजुट रहने उनको भनाइ थियो।

‘अदालतको पछिल्लो निर्णयले विशेष अधिवेशनको माग गर्ने साथीहरूलाई सच्चिने एउटा ठूलो अवसर दिएको छ। अब १५औँ महाधिवेशनलाई एकताको महाधिवेशन बनाउनतर्फ लाग्नुपर्छ। तपाईंहरूले गर्ने भनिएको १५औँ महाधिवेशन विभाजनको महाधिवेशन हुनेछ। हामी एकताको १५औँ महाधिवेशन चाहन्छौँ। त्यसैले पार्टी तोड्ने जस्तो अन्तिम गल्ती नगर्नुस्,’ साउदले भने।

साउदले पूर्वसभापति शेरबहादुर देउवा साउन २८ गते स्वदेश फर्कने जानकारी दिँदै साउन २९ गते बस्ने भेलाबाट पार्टीले नयाँ कार्यदिशा र दृष्टिकोण तय गर्ने बताए।

उनका अनुसार उक्त भेलाले पार्टीको आगामी नीति र राजनीतिक मार्गदिशाबारे छलफल गर्दै कांग्रेसलाई एकताबद्ध बनाएर अघि बढाउन आवश्यक निर्णय गर्नेछ।

Originally published on abcnews.com.np.