काठमाडौँ । प्रतिनिधिसभाको सोमबारको बैठकमा सरकारले तीनवटा विधेयक पेश गरेको छ।

अर्थमन्त्री डा. स्वर्णिम वाग्लेले कर्मचारी सञ्चय कोष (दशौँ संशोधन) विधेयक, २०८३ प्रतिनिधिसभामा पेश गरेका हुन्। विधेयकमार्फत कर्मचारी सञ्चय कोषको दायित्व र कार्यक्षेत्र विस्तार गर्ने उद्देश्य राखिएको उनले बताए।

कानुन, न्याय तथा संसदीय मामिलामन्त्री सोविता गौतमले मेलमिलाप सम्बन्धी (दोस्रो संशोधन) विधेयक, २०८३ पेश गरिन्। विधेयकले समाजमा देखिने द्वन्द्व तथा द्वेषपूर्ण सम्बन्धलाई मेलमिलापमार्फत समाधान गर्न सहयोग पुग्ने उनको भनाइ थियो।

त्यसैगरी युवा श्रम तथा रोजगारमन्त्री रामजी यादवले बालश्रम (निषेध तथा नियमित गर्ने) विधेयक, २०८३ पेश गरेका छन्। बालश्रम अन्त्यका लागि सरकार प्रतिबद्ध रहेको र सोही उद्देश्यअनुसार विधेयक ल्याइएको उनले बताए।

सरकारले पेश गरेका तीनवटै विधेयकमाथि प्रतिनिधिसभाको आगामी बैठकमा प्रक्रिया अघि बढाइनेछ।

Originally published on abcnews.com.np.