काठमाडौं । राष्ट्रिय खेलकुद परिषद् (राखेप)को बोर्ड सदस्यमा एथलेटिक्स प्रशिक्षक धनीराम चौधरी र भलिबलकी ललिता नाथ मनोनीत भएका छन्।

शिक्षा तथा खेलकुदमन्त्री सस्मित पोखरेलले सोमबार सिंहदरबारस्थित मन्त्रालयमा दुवैलाई नियुक्तिपत्र हस्तान्तरण गरेकी हुन्। राष्ट्रिय खेलकुद विकास ऐन, २०७७ को दफा ३ को उपदफा (२) को खण्ड (ट) बमोजिम राखेपको रिक्त सदस्य पदमा मन्त्रीस्तरीय निर्णयबाट उनीहरूलाई मनोनयन गरिएको हो।

दुवैको कार्यकाल चार वर्षको हुनेछ। नयाँ सरकारले राखेपको बोर्डमा खेलकुद क्षेत्रमा सक्रिय तथा खेलाडी पृष्ठभूमिका व्यक्तिलाई प्राथमिकता दिने नीतिअनुसार चौधरी र नाथलाई सदस्यमा मनोनयन गरेको हो।

चौधरी एथलेटिक्सका प्रशिक्षक हुन्। उनले नेपाल एथलेटिक्स संघमा समेत रहेर काम गरिसकेका छन्। लामो समयदेखि एथलेटिक्स क्षेत्रमा सक्रिय चौधरीसँग खेलाडी तथा प्रशिक्षकका रूपमा काम गरेको अनुभव छ।

नाथ न्यु डायमन्ड एकेडेमीकी सहायक प्रशिक्षक हुन्। उनले न्यु डायमन्ड क्लबबाट खेलाडीका रूपमा विभिन्न सफलता हासिल गरेकी छन्। यद्यपि उनले नेपाली राष्ट्रिय भलिबल टोलीबाट भने खेल्ने अवसर पाइनन्।

खेलाडी हुँदै प्रशिक्षण क्षेत्रमा सक्रिय नाथलाई अब राष्ट्रिय खेलकुद परिषद्को नीति निर्माण तथा खेलकुद विकाससँग सम्बन्धित जिम्मेवारीमा भूमिका निर्वाह गर्ने अवसर मिलेको छ।

यसअघि सरकारले राखेपको उपाध्यक्षमा पूर्वराष्ट्रिय फुटबल खेलाडी तथा गोलरक्षक विशाल श्रेष्ठलाई नियुक्त गरेको थियो।

त्यस्तै, राखेपको सदस्यमा टेबलटेनिसकी सिक्का सुवाल श्रेष्ठ, क्रिकेटका शक्ति गौचन र पवन शाही तथा चेसकी मोनालिसा खम्बुलाई मनोनयन गरिएको थियो।

सोमबार चौधरी र नाथ थपिएसँगै राखेप बोर्डमा खेलकुद क्षेत्रका विभिन्न विधाको प्रतिनिधित्व गर्ने सदस्यहरूको संख्या बढेको छ।

खेलाडी पृष्ठभूमिका व्यक्तिलाई प्राथमिकता

नयाँ नियुक्तिहरूले राष्ट्रिय खेलकुद परिषद्को नेतृत्व संरचनामा खेलाडी तथा खेल क्षेत्रमा लामो समय योगदान गरेका व्यक्तिको सहभागिता बढाएको छ।

राखेप बोर्डमा खेलाडी तथा प्रशिक्षक पृष्ठभूमिका व्यक्तिको उपस्थितिले खेलकुदका नीति निर्माण, पूर्वाधार विकास, खेलाडीको हित तथा अन्तर्राष्ट्रिय प्रतियोगिताका लागि आवश्यक तयारीमा व्यवहारिक दृष्टिकोण समेट्न सहयोग पुग्ने अपेक्षा गरिएको छ।

चौधरी र नाथको नियुक्तिसँगै राखेप बोर्डको रिक्त सदस्य पदसमेत पूर्ति भएको छ।

Originally published on abcnews.com.np.