धनगढी । सुदूरपश्चिम प्रदेश निर्वाचन कार्यालय, धनगढीले मतदाता नामावलीमा नाम छुटेका तथा विवरण सच्याउनुपर्ने नागरिकलाई समयमै मतदाता नामावली दर्ता तथा अद्यावधिक प्रक्रियामा सहभागी हुन आग्रह गरेको छ।

कार्यालयले बसाइँसराइ वा विवाहका कारण मतदाता विवरण परिवर्तन भएका तथा मृत्यु भएका मतदाताको नाम हटाउनेलगायतका कामसमेत जारी रहेको जनाएको छ।

धनगढीमा आयोजित वार्षिक समीक्षा तथा सरोकारवालासँगको अन्तरक्रिया कार्यक्रममा कार्यालय प्रमुख प्रेमराज भण्डारीले निर्वाचन आयोगको निर्णयअनुसार आगामी भदौ १५ गतेसम्म १८ वर्ष उमेर पूरा भएका नागरिकलाई मतदाता नामावलीमा समावेश गर्ने गरी अद्यावधिक प्रक्रिया सञ्चालन हुने जानकारी दिए।

उनका अनुसार नागरिकले अनलाइन प्रणालीमार्फत वा सम्बन्धित कार्यालयमा भौतिक रूपमा उपस्थित भएर मतदाता नामावली दर्ता तथा विवरण अद्यावधिक गर्न सक्नेछन्।

कार्यालय प्रमुख भण्डारीले मतदाता नामावली व्यवस्थापनलाई निर्वाचन कार्यालयमा मात्र सीमित नराखी स्थानीय तह र वडा कार्यालयसँगको समन्वयमा नागरिकको घरदैलोसम्म पुर्‍याउने योजना रहेको बताए।

स्थानीय पञ्जिकाधिकारीसँग समन्वय गरी विवाह, बसाइँसराइ र मृत्यु भएका व्यक्तिको विवरण भिडाएर मतदाता नामावली अद्यावधिक गर्ने कामभइरहेको उनले जानकारी दिए।

कार्यालयले यसअघि कैलालीका विभिन्न स्थानीय तहका १३ वटा वडा कार्यालयमा अनलाइन मतदाता नामावली प्रणालीसम्बन्धी सहजीकरणगरेको थियो।

गोदावरी, गौरीगङ्गा, घोडाघोडी, बर्दगोरिया र टीकापुरका विभिन्न वडामा अनलाइन मतदाता नामावली दर्ता तथा अद्यावधिक प्रणालीबारे अभिमुखीकरणसमेत सञ्चालन गरिएको कार्यालयले जनाएको छ।

कार्यक्रममा कैलालीका प्रमुख जिल्ला अधिकारी हिरालाल रेग्मी तथा विभिन्न राजनीतिक दलका प्रतिनिधिले आगामी निर्वाचनमा बढीभन्दा बढी नागरिकको सहभागिता सुनिश्चित गर्न आवश्यक व्यवस्थापन गर्नुपर्नेमा जोड दिए।

निर्वाचन कार्यालयले मतदाता नामावली दर्तालाई निर्वाचन शिक्षासँग जोडेर अघि बढाउन नमुना मतदानजस्ता व्यवहारिक कार्यक्रमलाई समेत प्राथमिकता दिएको जनाएको छ।

कार्यालय प्रमुख भण्डारीका अनुसार नमुना मतदानमा वास्तविक मतदान केन्द्रकै जस्तो वातावरण तयार गरी मतदातालाई मतदाता परिचय, मतदान प्रक्रिया, मतपत्र प्रयोग तथा मतदान गर्ने तरिकाबारे व्यवहारिक अभ्यास गराइन्छ।

यसबाट विशेषगरी पहिलोपटक मतदान गर्न लागेका युवा तथा निर्वाचन प्रक्रियाबारे अन्योलमा रहेका नागरिकको आत्मविश्वास बढ्ने अपेक्षा गरिएको छ।

यसअघि कार्यालयले कैलालीका १२६ वटै वडामा मतदाता शिक्षा स्वयंसेवक परिचालन गरी निर्वाचनसम्बन्धी सूचना तथा मतदाता शिक्षा कार्यक्रम सञ्चालन गरेको थियो।

दुई लाखभन्दा बढी नागरिक मतदाता शिक्षाबाट लाभान्वित

कार्यालयका अनुसार विभिन्न स्थानीय तहका २८ विद्यालय तथा शैक्षिक संस्थामा ४३ समूह परिचालन गरी मतदाता शिक्षा कार्यक्रम सञ्चालन गरिएको छ।

त्यस क्रममा विशेष मतदाता शिक्षा कार्यक्रमबाट २ लाख ३ हजार ५३६ जना तथा निर्वाचन शिक्षा कार्यक्रमबाट २ लाख ६ हजार ५०८ जनालाभान्वित भएका छन्।

यसले मतदाता नामावली व्यवस्थापनसँगै निर्वाचन प्रक्रियाबारे नागरिकलाई जानकारी गराउने कामलाई समेत कार्यालयले प्राथमिकता दिएको देखाउँछ।

आर्थिक वर्ष २०८२/८३ मा कैलालीमा मात्रै २८ हजार ५७३ जना नयाँ मतदाता दर्ता भएका छन्।

तीमध्ये राष्ट्रिय परिचयपत्र प्रणालीमार्फत २१ हजार ८५७ जना र निर्वाचन कार्यालयमै जैविक विवरण सङ्कलन गरी ६ हजार ७१६ जना नयाँ मतदाता दर्ता भएको कार्यालयले जनाएको छ।

सोही अवधिमा मतदाता विवरण सच्याउने, मतदाता सार्ने तथा मृत्यु भएका व्यक्तिको नाम हटाउनेलगायत ३ हजार ६६५ वटा अद्यावधिक कार्य सम्पन्न भएका छन्।

निर्वाचन कार्यालयले मतदाता नामावलीलाई शुद्ध, अद्यावधिक र विश्वसनीय बनाउन नागरिकको सहभागिता आवश्यक रहेको जनाएको छ। विशेषगरी नाम छुटेका, विवरणमा त्रुटि भएका तथा विवाह, बसाइँसराइ वा मृत्युका कारण विवरण परिवर्तन भएका व्यक्तिले तोकिएको समयभित्र प्रक्रिया पूरा गर्न कार्यालयले आग्रह गरेको छ।

Originally published on abcnews.com.np.