काठमाडौँ । हलिउड फिल्म ‘स्पाइडर म्यान: ब्रान्ड न्यु डे’ले नेपालमा प्रदर्शनको १२ दिनमै १४ करोड २४ लाख १९ हजार ८५० रुपैयाँ व्यापार गरेको छ।

चलचित्र विकास बोर्डका अनुसार फिल्मले नेपाली दर्शकबाट उत्साहजनक प्रतिक्रिया पाएको छ। यससँगै ‘ब्रान्ड न्यु डे’ नेपालमा सर्वाधिक कमाइ गर्ने हलिउड फिल्म बनेको छ।

यसअघि सन् २०२२ मा प्रदर्शन भएको ‘अवतार: द वे अफ वाटर’ले नेपालमा करिब १२ करोड रुपैयाँ कमाएर सर्वाधिक कमाउने हलिउड फिल्मको रेकर्ड बनाएको थियो। ‘स्पाइडर म्यान: ब्रान्ड न्यु डे’ले उक्त रेकर्ड तोडेको हो।

फिल्मले प्रदर्शनको पहिलो दिनमै १ करोड ९९ लाख ६९ हजार ९४५ रुपैयाँ कमाएको थियो। यो नेपालमा कुनै पनि हलिउड फिल्मले गरेको सबैभन्दा ठूलो ओपनिङ कलेक्सन भएको बोर्डले जनाएको छ।

विश्वव्यापी रूपमा पनि सफल

टम हल्यान्ड, जेन्डाया, सेडी सिंक, ज्याकोब बाटालोन, जोन बर्नथल, ट्रामेल टिलम्यान, माइकल म्यान्डो र मार्क रफालोलगायत कलाकारको अभिनय रहेको फिल्मलाई डेस्टिन ड्यानियल क्रेटनले निर्देशन गरेका हुन्।

क्रिस म्याककेना र एरिक सोमर्सले पटकथा लेखेको फिल्म स्टान ली र स्टिभ डिट्कोको कमिक बुकमा आधारित छ।

फिल्मले विश्वव्यापी बक्सअफिसमा पनि उल्लेख्य सफलता हासिल गरेको छ। प्रदर्शनको १२औँ दिनसम्म फिल्मले विश्वभर १ अर्ब ६७ करोड अमेरिकी डलर कमाइसकेको दाबी गरिएको छ।

विश्वव्यापी ओपनिङका आधारमा भने ‘ब्रान्ड न्यु डे’ दोस्रो स्थानमा छ। ‘एभेन्जर्स: इन्डगेम’ पहिलो स्थानमा छ। अमेरिकी घरेलु बक्सअफिसमा समेत ‘ब्रान्ड न्यु डे’ सन् २०२६ को सर्वाधिक कमाइ गर्ने फिल्म बनेको बताइएको छ।

Originally published on abcnews.com.np.