काठमाडौं । शङ्कर ग्रुपअन्तर्गतको जगदम्बा मोटर्सले नेपाली बजारमा प्रोटोनको नयाँ कम्प्याक्ट विद्युतीय एसयूभी ‘ई.मास ५’ सार्वजनिक गरेको छ। आधुनिक डिजाइन, प्रविधि र प्रतिस्पर्धी मूल्यसहित ल्याइएको यो विद्युतीय एसयूभी प्राइम र प्रिमियम गरी दुई भेरियन्टमा उपलब्ध हुनेछ।

कम्पनीका अनुसार प्राइम भेरियन्टमा ३०.१२ किलोवाट घण्टा क्षमताको ब्याट्री प्रयोग गरिएको छ। यसले डब्लुएलटीपी मापदण्डअनुसार एकपटक पूर्ण चार्जमा २२५ किलोमिटरसम्म यात्रा गर्न सक्छ। प्रिमियम भेरियन्टमा भने ४०.१६ किलोवाट घण्टा क्षमताको ब्याट्री रहेको छ, जसले ३२५ किलोमिटरसम्मको रेन्ज दिने कम्पनीको दाबी छ।

दुवै भेरियन्टमा रियर–ह्विल ड्राइभ प्रणाली जडान गरिएको छ। गाडीमा १४.६ इन्चको फ्लोटिङ टचस्क्रिन इन्फोटेनमेन्ट सिस्टम, एप्पल कारप्ले, एन्ड्रोइड अटो, ४जी तथा वाइ–फाइ कनेक्टिभिटी र डीसी फास्ट चार्जिङ सुविधा उपलब्ध छन्।

सुरक्षातर्फ ई.मास ५ मा इलेक्ट्रोनिक स्टेबिलिटी कन्ट्रोल, एन्टिलक ब्रेकिङ सिस्टम, इलेक्ट्रोनिक ब्रेक–फोर्स डिस्ट्रिब्युसन, टायर प्रेसर मोनिटरिङ सिस्टम, हिल होल्ड असिस्ट, ३६० डिग्री सराउन्ड भ्यू क्यामेरा र रियर पार्किङ सेन्सरजस्ता सुविधा दिइएको छ।

प्रिमियम भेरियन्टमा भने थप रूपमा एड्भान्स्ड ड्राइभर असिस्टेन्स सिस्टम (एडीएएस) अन्तर्गत एडाप्टिभ क्रुज कन्ट्रोल, अटोनोमस इमर्जेन्सी ब्रेकिङ, ब्लाइन्ड स्पट डिटेक्सन र लेन डिपार्चर वार्निङजस्ता प्रविधि समावेश छन्।

पहिलो १०० ग्राहकलाई विशेष मूल्य

कम्पनीले प्रोटोन ई.मास ५ को प्राइम भेरियन्टको मूल्य ३२ लाख ९९ हजार रुपैयाँ निर्धारण गरेको छ। तर पहिलो १०० ग्राहकका लागि विशेष योजनाअन्तर्गत यो गाडी २९ लाख ९९ हजार रुपैयाँ मा उपलब्ध गराइने जनाएको छ।

त्यस्तै, प्रिमियम भेरियन्टको मूल्य ३६ लाख ९९ हजार रुपैयाँ तोकिएको छ। पहिलो १०० ग्राहकले भने यसलाई ३४ लाख ९९ हजार रुपैयाँ मा खरिद गर्न सक्नेछन्।

प्रतिस्पर्धी मूल्य, फराकिलो रेन्ज, स्मार्ट प्रविधि र सुरक्षा सुविधाका कारण ई.मास ५ ले नेपाली विद्युतीय एसयूभी बजारमा नयाँ प्रतिस्पर्धा थप्ने अपेक्षा गरिएको छ।

Originally published on abcnews.com.np.