काठमाडौं । नेकपा एमालेका सांसद चन्द्रेश्वर मण्डलले प्रधानमन्त्री वालेन्द्र शाहले भारतलाई खुसी पार्ने उद्देश्यले नेपाल–भारत सीमा सम्बन्धी अभिव्यक्ति दिएको आरोप लगाएका छन्।

मंगलबार प्रतिनिधिसभाको बैठकमा बोल्दै सांसद मण्डलले प्रधानमन्त्री शाहले नेपालले पनि भारतका विभिन्न स्थानमा सीमा मिचेको भन्ने आशयको अभिव्यक्ति दिएको भन्दै त्यसलाई तत्काल सच्याउन माग गरे।

पार्टी सभापति रवि लामिछानेको भारत भ्रमणका क्रममा प्रधानमन्त्रीबाट आएको उक्त अभिव्यक्ति भारतलाई रिझाउने उद्देश्यबाट प्रेरित भएको मण्डलको दाबी थियो।

“बालेन्द्र शाहजीले नेपालले पनि भारतको धेरै ठाउँमा सीमा मिचेको छ भनेर रोष्ट्रममा उभिएर दिएको अभिव्यक्ति त्यसै आएको होइन,” मण्डलले भने, “त्यो निश्चित रूपमा भारतलाई खुसी पार्न आएको हो।”

प्रधानमन्त्रीको यस्तो अभिव्यक्ति गैरजिम्मेवारपूर्ण भएको बताउँदै उनले नेपालको सार्वभौमिकता र राष्ट्रिय हितसँग जोडिएका विषयमा प्रधानमन्त्रीले संवेदनशील भएर बोल्नुपर्ने धारणा राखे।

मण्डलले विवादित अभिव्यक्ति संसद्को अभिलेखमा राख्न नमिल्ने भन्दै त्यसलाई सच्याउनसमेत माग गरे। उनका अनुसार प्रधानमन्त्रीको उक्त भनाइले नेपालको सीमा तथा सार्वभौमिकतासम्बन्धी विषयमा अनावश्यक प्रश्न उठाउने अवस्था सिर्जना गर्न सक्छ।

उनले प्रधानमन्त्रीलाई आफ्नो अभिव्यक्ति तत्काल सच्याएर नेपालको राष्ट्रिय हित र सीमा सुरक्षासम्बन्धी विषयमा स्पष्ट धारणा सार्वजनिक गर्न आग्रह गरे।

Originally published on abcnews.com.np.