काठमाडौं । नेपाली कम्युनिस्ट पार्टी (नेकपा)का सांसद गोपाल शर्माले प्रधानमन्त्री वालेन्द्र शाहलाई ‘गुप्तवास’ शैलीको राजनीतिक व्यवहार त्यागेर संसद्मा उपस्थित हुन आग्रह गरेका छन्।

मंगलबार प्रतिनिधि सभाको बैठकमा विशेष समय लिएर बोल्दै सांसद शर्माले प्रधानमन्त्री संसद् र आफूलाई समर्थन गर्ने राजनीतिक दलहरूबाट टाढिँदै गएको टिप्पणी गरे। उनले प्रधानमन्त्री संसद्मा उपस्थित भएर जनप्रतिनिधिसँग निरन्तर संवाद र सहकार्य गर्नुपर्ने बताए।

‘तपाईंले सकारात्मक पहल गर्नुभयो भने संसद्ले साथ दिन्छ, तर गलत प्रक्रिया अपनाउनुभयो भने संसद् नै तपाईंको विपक्षमा उभिन्छ,’ शर्माले भने।

प्रधानमन्त्री शाहलाई प्रधानमन्त्री बनाउन सहयोग गर्ने दल र विश्वासको मत दिने संसद्बाट टाढिएर सरकार सञ्चालन गर्न नसकिने शर्माको भनाइ थियो। उनले प्रधानमन्त्रीले आफूलाई समर्थन गर्ने दलका कार्यालयमा समेत जान छोडेको भन्दै आलोचना गरे।

‘जसले तपाईंलाई प्रधानमन्त्री बनायो, त्यो दल र जसले तपाईंलाई विश्वासको मत दियो, त्यो संसद्बाट टाढा भएर सरकार चलाउन सकिँदैन,’ उनले भने, ‘त्यसैले संसद्सँग निरन्तर संवाद र सहकार्य गर्न म प्रधानमन्त्रीज्यूलाई आग्रह गर्दछु।’

प्रधानमन्त्री संसद् र राजनीतिक दलबाट टाढिँदै गएकै कारण सामाजिक सञ्जालमा एक्लोपन झल्किने खालका ‘स्टाटस’ लेख्ने अवस्थामा पुगेको शर्माले टिप्पणी गरे।

‘प्रधानमन्त्रीज्यूलाई मेरो आग्रह छ, गुप्तवासमा नबस्नुहोस्। तपाईं एक्लै हुँदा एक्लै हुनुहुन्छ, तर संसद्मा आउँदा सांसद र सिंगो संसद् तपाईंको साथमा हुन्छ,’ उनले भने।

शर्माले प्रधानमन्त्रीका पछिल्ला केही अभिव्यक्ति विवादास्पद रहेको भन्दै त्यसप्रति सभामुखको ध्यानाकर्षणसमेत गराए। उनले प्रधानमन्त्रीलाई आफ्ना गलत अभिव्यक्ति सच्याउन रुलिङ गर्न तथा विवादित भनाइहरू संसद्को अभिलेखबाट हटाउन सभामुखसँग माग गरे।

Originally published on abcnews.com.np.