काठमाडौं । नेपाली कांग्रेसको संस्थापन इतर समूहले पार्टीका निवर्तमान सभापति शेरबहादुर देउवाको स्वदेश फर्किएलगत्तै भव्य स्वागत गर्ने तयारी गरेको छ। यही साउन २८ गते नेपाल फर्कन लागेका देउवालाई त्रिभुवन अन्तर्राष्ट्रिय विमानस्थलमा ठूलो सङ्ख्यामा नेता–कार्यकर्ता उपस्थित गराएर स्वागत गर्ने तयारी गरिएको हो।

कांग्रेस नेता एनपी साउदका अनुसार देउवाको स्वागतका लागि करिब पाँच हजार नेता–कार्यकर्ता विमानस्थलमा उपस्थित हुनेछन्। स्वागतपछि देउवालाई विमानस्थलबाट धुम्बाराहीस्थित निवाससम्म ‘स्कर्टिङ’ गर्ने कार्यक्रमसमेत तय गरिएको उनले बताए।

इतर समूहको राष्ट्रिय भेलामा सहभागी हुन उपत्यकाबाहिरबाट काठमाडौं आउने तथा राजधानीमै रहेका प्रजातन्त्रवादी नेता–कार्यकर्तालाई देउवाको स्वागतमा सहभागी गराउने तयारी भइरहेको साउदले जानकारी दिए।

उनका अनुसार देउवालाई स्वागत गर्न देशका विभिन्न जिल्लाबाट कांग्रेसका नेता तथा कार्यकर्ता राजधानी आउने भएका छन्। विमानस्थलमा स्वागत गरेपछि उनीहरू देउवासँगै धुम्बाराहीस्थित निवाससम्म जानेछन्।

देउवाको स्वागत कार्यक्रमलाई कांग्रेसको आन्तरिक राजनीतिक गतिविधिसँग समेत जोडेर हेरिएको छ। पार्टीभित्र नेतृत्व, संगठन र आगामी राजनीतिक दिशाबारे बहस चलिरहेका बेला इतर समूहले देउवाको स्वागतका लागि ठूलो सङ्ख्यामा नेता–कार्यकर्ता जुटाउने तयारी गरेको हो।

Originally published on abcnews.com.np.