काठमाडौं । काठमाडौं महानगरपालिका–२७ स्थित गाउँबेँसी थकाली भान्साघरमा जुवा (कौडा) खेलिरहेको अवस्थामा प्रहरीले १६ जनालाई पक्राउ गरेको छ।

प्रहरीका अनुसार सोमबार साउन २५ गते प्रहरी वृत्त दरबारमार्गबाट खटिएको टोलीले जुवा खेलिरहेको अवस्थामा उनीहरूलाई नियन्त्रणमा लिएको हो।

पक्राउ पर्नेमा काभ्रेका ४२ वर्षीय रेशमबहादुर घ्यावासहित अन्य व्यक्ति रहेका छन्। प्रहरीले उनीहरूको साथबाट १६ थान कौडा र १३ लाख १७ हजार १२५ रुपैयाँ नगद बरामद गरेको जनाएको छ।

जिल्ला प्रहरी परिसर काठमाडौंका एसपी दानबहादुर थापाका अनुसार पक्राउ परेकामाथि आवश्यक अनुसन्धान अघि बढाइएको छ। उनीहरूलाई थप अनुसन्धानका लागि प्रहरी कार्यालयमा पठाइएको छ।

प्रहरीले काठमाडौं उपत्यकामा जुवातास तथा गैरकानुनी सट्टेबाजीजन्य गतिविधि नियन्त्रणका लागि निगरानी तथा कारबाहीलाई निरन्तरता दिँदै आएको जनाएको छ।

Originally published on abcnews.com.np.