काठमाडौँ । पतञ्जलि योगपीठ तथा आयुर्वेद कम्पनी नेपालको जग्गा हिनामिना प्रकरणमा पूर्वप्रधानमन्त्री एवं नेकपा सहसंयोजक माधवकुमार नेपालसहित प्रतिवादी रहेको भ्रष्टाचार मुद्दामा विशेष अदालतले अख्तियार दुरुपयोग अनुसन्धान आयोगका साक्षी झिकाउने आदेश दिएको छ।

विशेष अदालतका सदस्यद्वय नारायणप्रसाद पौडेल र उमेश कोइरालाको इजलासमा मंगलबार सुनुवाइपछि सरकारी पक्षका साक्षी उपस्थित गराउने आदेश भएको हो। अब अख्तियारका साक्षी उपस्थित भएपछि मुद्दाको थप सुनुवाइ अघि बढ्नेछ।

यसअघि विशेष अदालतका अध्यक्ष सुदर्शनदेव भट्ट र न्यायाधीश हेमन्त रावलको इजलासले अख्तियारले माधवकुमार नेपाललगायत व्यक्तिमाथि अनुसन्धान गरी तामेलीमा राख्ने निर्णयसँग सम्बन्धित फाइल झिकाउन आदेश दिएको थियो। अदालतको आदेशअनुसार अख्तियारबाट २०६९ मंसिर २५ मा भएको निर्णयसहितको फाइलसमेत अदालतमा प्राप्त भइसकेको छ।

अख्तियारले पतञ्जलि योगपीठको जग्गा प्रकरणमा पूर्वप्रधानमन्त्री नेपालसहित ९३ जनालाई प्रतिवादी बनाएर २०८२ जेठ २२ गते भ्रष्टाचार मुद्दा दायर गरेको थियो। नेपालविरुद्ध अख्तियारले १८ करोड ५८ लाख ५० हजार रुपैयाँ बिगो, जरिवाना तथा सजायको मागदाबी गरेको छ।

अख्तियारका अनुसार नेपाल नेतृत्वको तत्कालीन मन्त्रिपरिषद्ले २०६६ फागुन ६ गते गरेको निर्णयबाट पतञ्जलिलाई जग्गाको हदबन्दीभन्दा बढी जग्गा कारोबार गर्न स्वीकृति दिइएको थियो। सोही निर्णय प्रक्रियामा भ्रष्टाचार भएको दाबी अख्तियारको छ।

प्रकरणमा ३१४ रोपनी १५ आना २ पैसा १ दाम जग्गा गैरकानुनी रूपमा बिक्री तथा हिनामिना गरिएको आरोप लगाइएको छ।

अब सरकारी तथा प्रतिवादी पक्षका साक्षीको बकपत्रपछि मुद्दा अन्तिम सुनुवाइतर्फ अघि बढ्नेछ।

Originally published on abcnews.com.np.