काठमाडौँ । सरकारले निर्मलकुमार उप्रेतीलाई वैदेशिक रोजगार बोर्डको कार्यकारी निर्देशकमा नियुक्त गरेको छ।

मंगलबार बसेको मन्त्रिपरिषद्को बैठकले उप्रेतीलाई बोर्डको कार्यकारी निर्देशकमा नियुक्त गर्ने निर्णय गरेको हो।

सरकारका प्रवक्ता एवं शिक्षा तथा खेलकुदमन्त्री सस्मित पोखरेलले मन्त्रिपरिषद्का निर्णय सार्वजनिक गर्दै उप्रेतीलाई वैदेशिक रोजगार बोर्डको कार्यकारी निर्देशकमा नियुक्त गरिएको जानकारी दिनुभयो।

“मन्त्रिपरिषद्ले उप्रेतीलाई बोर्डको कार्यकारी निर्देशक पदमा नियुक्त गर्ने निर्णय गरिसकेको छ,” मन्त्री पोखरेलले भन्नुभयो।

उहाँका अनुसार नवनियुक्त कार्यकारी निर्देशक उप्रेती बारा जिल्लाका बासिन्दा हुनुहुन्छ।

काठमाडौँमा पोर्चुगलको कन्सुलर कार्यालय खुल्ने

यसैगरी, सरकारले पोर्चुगल सरकारलाई काठमाडौँमा कन्सुलर कार्यालय खोल्न अनुमति दिएको छ।

मन्त्री पोखरेलका अनुसार नेपाल र पोर्चुगलबीचको द्विपक्षीय सम्बन्धलाई थप सुदृढ बनाउने उद्देश्यले पोर्चुगललाई काठमाडौँमा कन्सुलर कार्यालय खोल्न स्वीकृति दिइएको हो।

नेपाल र पोर्चुगलबीच लामो समयदेखि मैत्रीपूर्ण तथा सहकार्यपूर्ण सम्बन्ध रहँदै आएको छ। दुई देशबीचको सम्बन्धलाई थप संस्थागत र प्रभावकारी बनाउन पोर्चुगलले काठमाडौँमा कन्सुलर कार्यालय स्थापना गर्ने इच्छा व्यक्त गरेको थियो।

सरकारको पछिल्लो निर्णयसँगै पोर्चुगललाई नेपालमा कन्सुलर सेवा विस्तार गर्ने बाटो खुलेको छ।

Originally published on abcnews.com.np.