काठमाडौँ । भारतीय प्रधानमन्त्री नरेन्द्र मोदीले नेपालका प्रधानमन्त्री बालेन्द्र शाह (बालेन) लाई भारत भ्रमणको निम्ता दिएको भारतीय विदेश मन्त्रालयले पुष्टि गरेको छ।
भारतीय विदेश मन्त्रालयका प्रवक्ता रणधीर जैसवालले मंगलबार आयोजित पत्रकार सम्मेलनमा पत्रकारहरूले सोधेको प्रश्नको जवाफ दिँदै प्रधानमन्त्री बालेनलाई भारत भ्रमणको निम्ता दिइएको पुष्टि गरेका हुन्।
पत्रकार सम्मेलनमा प्रधानमन्त्री बालेन र नेपालका लागि भारतीय राजदूत नवीन श्रीवास्तवबीच काठमाडौँमा भएको भेटवार्ता, ब्रिक्स सम्मेलनमा नेपालको सहभागिता तथा सुगौली सन्धिबारे परराष्ट्रमन्त्री शिशिर खनालले व्यक्त गरेको धारणालगायतका विषयमा प्रश्न गरिएको थियो।
भारतीय राजदूत श्रीवास्तवसँग प्रधानमन्त्री बालेनको भेटवार्तामा द्विपक्षीय हितका विषयमा छलफल भएको जानकारी दिँदै प्रवक्ता जैसवालले प्रधानमन्त्रीको भारत भ्रमणको मिति तय भएपछि जानकारी गराउने बताए।
“नेपालका प्रधानमन्त्रीको भारत भ्रमणको मिति तय हुनासाथ जानकारी गराउनेछु,” उनले भने।
नेपाल सरकारले भारतीय प्रधानमन्त्री मोदीले दिएको भ्रमणको निमन्त्रणा स्वीकार गरिसकेको बताइएको छ।
परराष्ट्रमन्त्री खनालले यसअघि नै जानकारी दिएका थिए
नवौँ हिन्द महासागर सम्मेलनमा सहभागी हुन मौरिसस पुगेका परराष्ट्रमन्त्री शिशिर खनालले गत चैतमै प्रधानमन्त्री बालेनले भारत भ्रमणको निमन्त्रणा पाइसकेको सार्वजनिक गरेका थिए।
मौरिसस भ्रमणका क्रममा उनले भारतीय विदेशमन्त्री एस जयशंकरसँग भेटवार्तासमेत गरेका थिए।
प्रधानमन्त्री बालेनले प्रोटोकलअनुसार प्रधानमन्त्रीसँग मात्र भेटवार्ता गर्ने अडान लिएपछि भारत भ्रमणको विषय केही समय लम्बिएको थियो। यही क्रममा सोमबार प्रधानमन्त्री बालेन र भारतीय राजदूत नवीन श्रीवास्तवबीच काठमाडौँमा भेटवार्ता भएको थियो।
ब्रिक्स सम्मेलनमा नेपालको सहभागिताबारे पनि छलफल
मंगलबारको पत्रकार सम्मेलनमा भारतीय विदेश मन्त्रालयका प्रवक्ता जैसवालले ब्रिक्स सम्मेलनमा क्षेत्रीय संगठनका नेताहरूलाई निमन्त्रणा गर्ने तयारी भइरहेको जानकारी दिए।
“हामीले क्षेत्रीय गठबन्धनबाट धेरै नेताहरूलाई निमन्त्रणा दिएका छौँ। यस विषयमा थप जानकारी दिँदै जानेछौँ,” उनले भने।
प्रधानमन्त्री बालेन भारत भ्रमणमा गएमा ब्रिक्स सम्मेलनमा नेपालको सहभागिता र क्षेत्रीय सहकार्यका विषयमा समेत छलफल हुन सक्ने देखिएको छ।
‘नेपाल–भारत सम्बन्ध राम्रो छ’
नेपाल र भारतबीच पछिल्लो समय केही विषयमा मतभेद देखिए पनि द्विपक्षीय सम्बन्ध र कूटनीतिक संवाद निरन्तर रहेको भारतीय पक्षले जनाएको छ।
नेपाल–भारत सम्बन्धबारे टिप्पणी गर्दै प्रवक्ता जैसवालले कुनै–कुनै विषयमा सहमति नबने पनि मतभेद समाधानका लागि दुई देशबीच विभिन्न संयन्त्र रहेको बताए।
“कुनै–कुनै विषयमा सहमति नबने पनि जुनसुकै विषयमा द्विपक्षीय वार्ता गर्ने संयन्त्रहरू छन्। नेपाल र भारतको सम्बन्ध राम्रो छ,” उनले भने।
मतभेद वार्ताबाटै समाधान गर्ने प्रतिबद्धता
जैसवालले दुई देशबीच उत्पन्न समस्या तथा मतभेद समाधान गर्न आवश्यक कूटनीतिक संयन्त्रहरू उपलब्ध रहेको बताए।
उनका अनुसार ती संयन्त्रमार्फत आपसी मतभेदलाई संवाद र वार्ताबाट समाधान गरिनेछ।
भारतले नेपालसँगको सम्बन्धलाई उच्च महत्व दिँदै आएको र आगामी दिनमा पनि दुई देशबीचको सम्बन्धलाई थप सुदृढ बनाउन चाहेको उनले बताए।
Originally published on abcnews.com.np.
प्रतिक्रिया दिनुहोस्