ललितपुर । एकै दिन ललितपुरका पाँच ठाउँमा चोरी गरेको आरोपमा प्रहरीले एक युवकलाई पक्राउ गरेको छ। पक्राउ पर्नेमा गोदावरी नगरपालिका–१४ ठैब बस्ने ३३ वर्षीय सुरज महर्जन छन्।

प्रहरीका अनुसार साउन २२ गते बिहान करिब ८ बजे ललितपुर महानगरपालिका–२८ हरिसिद्धिस्थित रिना महर्जनको घरमा चोरी भएको थियो। घटनापछि प्रहरीले आसपासका सीसीटीभी फुटेजका आधारमा चोरीमा संलग्न व्यक्तिको खोजी थालेको थियो।

खोजीका क्रममा प्रहरी वृत्त सातदोबाटोको टोलीले बा.९० प २७६४ नम्बरको मोटरसाइकलमा भाग्दै गरेको अवस्थामा महर्जनलाई पक्राउ गरेको हो। उनको शरीर खानतलासी गर्दा ‘सीएटी’ लेखिएको कालो झोलाभित्र सुनचाँदीका गरगहनालगायत चोरीका सामान फेला परेको प्रहरीले जनाएको छ।

प्रहरीका अनुसार महर्जनले सोही दिन पाँच स्थानमा चोरी गरेको प्रारम्भिक अनुसन्धानबाट खुलेको छ।

के–के बरामद भयो ?

महर्जनको साथबाट सुनजस्तो देखिने धातुका गरगहना, चाँदीजस्तो देखिने गरगहना, हवाईट गोल्ड तथा डायमण्डजस्तो देखिने औँठी, सिक्का र नगद बरामद भएको प्रहरीले जनाएको छ।

बरामद सामग्रीमा नौगेडी, हार, झुम्का, औँठी, सिक्री, तिलहरी, चुरा तथा बालालगायतका गरगहना छन्। यस्तै, चाँदीजस्तो देखिने तीनवटा औँठी, चाबी झुन्ड्याउने रिङ, हार, हनुमानको लकेटसहितको सिक्री, ब्रासलेट र पाउजु पनि बरामद भएको छ।

प्रहरीले नगद ११ हजार ३९० रुपैयाँ, पुराना तथा नयाँ सिक्का र दुईवटा महिला झोलासमेत बरामद गरेको छ।

महर्जनलाई चोरी मुद्दामा पक्राउ गरी ललितपुर जिल्ला अदालतबाट पाँच दिनको म्याद थप गरिएको छ। प्रहरीले घटनाबारे थप अनुसन्धान गरिरहेको जनाएको छ।

Originally published on abcnews.com.np.