काठमाडौं । अमेरिकी सेनाले इरानी बन्दरगाहमाथि लगाइएको समुद्री नाकाबन्दी तोड्ने प्रयास गरेको आरोपमा ओमानको खाडीमा एक मालवाहक जहाजमाथि आक्रमण गरेको छ ।

अमेरिकी सेन्ट्रल कमान्डका अनुसार अमेरिकी नौसेनाको हेलिकोप्टरले पानामाको झण्डा बोकेको ‘भेला नोभा’ नामक मालवाहक जहाजमाथि दुईवटा ‘हेलफायर’ क्षेप्यास्त्र प्रहार गरेको हो । मंगलबार भएको आक्रमणमा जहाजको इन्जिन रुमलाई निशाना बनाइएको सेन्ट्रल कमान्डले जनाएको छ ।

अमेरिकी सेनाका अनुसार उक्त जहाज ओमानको खाडी हुँदै इरानी बन्दरगाहतर्फ अघि बढिरहेको थियो । जहाजका चालक दललाई पटक–पटक चेतावनी दिइए पनि निर्देशन पालना नगरेपछि आक्रमण गरिएको अमेरिकी पक्षको दाबी छ ।

आक्रमणबाट चालक दलका सदस्य घाइते भए वा नभएकोबारे भने अमेरिकी सेनाले कुनै विवरण सार्वजनिक गरेको छैन ।

५५ व्यावसायिक जहाज रोकिएको अमेरिकी दाबी

सेन्ट्रल कमान्डका अनुसार इरानी बन्दरगाहमाथि लगाइएको समुद्री नाकाबन्दी कार्यान्वयन गर्ने क्रममा हालसम्म ५५ वटा व्यावसायिक जहाजलाई मार्ग परिवर्तन गर्न लगाइएको छ ।

हालै पुनः सुरु भएको अमेरिका–इरान सैन्य तनावबीच अमेरिकाले इरानी बन्दरगाहमाथि समुद्री नाकाबन्दी लागू गरेको हो । इरानले भने हर्मुज जलमार्गमा पुनः आफ्नो नियन्त्रण कायम गरेको दाबी गर्दै आएको छ ।

यसअघि भएको समझदारीपछि हटाइएका नाकाबन्दी तथा नियन्त्रणका व्यवस्था पछिल्लो सैन्य तनावसँगै पुनः लागू भएका हुन् । घटनाले ओमानको खाडी र हर्मुज जलमार्गमा बढ्दो तनावलाई थप गम्भीर बनाएको छ ।

Originally published on abcnews.com.np.