रुकुमपश्चिम, साउन २८ गते । त्रिदेशीय व्यापारिक सडकका रूपमा रहेको भेरी करिडोरअन्तर्गत रुकुमपश्चिम–जाजरकोट–डोल्पा सडकखण्ड एक महिनादेखि अवरुद्ध हुँदा सर्वसाधारणले सास्ती खेपिरहेका छन् । वर्षायाम सुरु भएसँगै बाढी, पहिरो र खहरे खोलामा आएको भेलका कारण सडक पटकपटक अवरुद्ध हुने गरेको हो ।

प्रहरीका अनुसार गत साउन ६ गतेदेखि रुकुमपश्चिम हुँदै डोल्पा जाने सडकखण्ड पूर्ण रूपमा अवरुद्ध छ । आठबीसकोट नगरपालिका–६ स्थित रिजेगार्ड खोलामा आएको बाढी र पहिरोका कारण मुख्य रूपमा सडक अवरुद्ध भएको जिल्ला प्रहरी कार्यालयले जनाएको छ ।

प्रहरी नायब उपरीक्षक (डीएसपी) बेदबहादुर पौडेलका अनुसार खोलामा पानीको बहाव कम भएको समयमा डोजरको सहायताले मालबाहक सवारीसाधनलाई जोखिम मोलेर पार गराउने गरिएको छ । यात्रुबाहक सवारीसाधन भने पूर्ण रूपमा बन्द छन् ।

रिजेगार्ड खोलामै गत साउन १४ गते खाना पकाउने एलपी ग्यासका ३२० सिलिन्डर बोकेको ट्रक पल्टिँदा ठूलो क्षति भएको थियो । विभिन्न समयमा खोलाको भेलमा फसेका मोटरसाइकलसहित यात्रुहरूको समेत प्रहरीले उद्धार गर्दै आएको छ ।

रिजेगार्ड खोलाका अतिरिक्त आठबीसकोट–६ कै उसुमखोला, मन्काखोला र साङ्ले खोला तथा आठबीसकोट–११ को चिसापानी खोलामा आउने खहरे भेलले समेत सडक अवरुद्ध गर्ने गरेको छ । जाजरकोटतर्फको चौखाखोलालगायत विभिन्न स्थानमा पहिरो खस्दा यात्रु तथा सवारीसाधन जोखिम मोलेर यात्रा गर्न बाध्य छन् ।

पुल र सडक निर्माण अधुरै

भारतबाट नेपाल हुँदै चीन जोड्ने महत्वपूर्ण मार्गका रूपमा रहेको भेरी करिडोरमा विभिन्न स्थानमा पुल निर्माण, सडक ग्राभेल तथा कालोपत्रेको काम अझै पूरा हुन सकेको छैन । जसका कारण वर्षायाममा मात्रै नभई अन्य समयमा समेत जोखिमपूर्ण यात्रा गर्नुपर्ने अवस्था रहेको आठबीसकोट नगरपालिका–६ का वडाध्यक्ष धनेश्वर शर्माले बताउनुभयो ।

उहाँका अनुसार ट्र्याक खोलिएका सडकमा आवश्यक संरचना र स्तरोन्नतिको काम पूरा नहुँदा यातायात सञ्चालनमै समस्या भइरहेको छ । नेपालगन्जबाट डोल्पाका लागि सामान तथा यात्रु बोकेर हिँडेका सवारीसाधन बाटोमै अलपत्र पर्ने गरेका छन् ।

सडक अवरुद्ध भएपछि डोल्पाबाट प्रदेश राजधानी सुर्खेत तथा प्रमुख व्यापारिक केन्द्र नेपालगन्ज आउजाउसमेत प्रभावित भएको छ । सडकको दुरवस्थाका कारण पर्यटकीय क्षेत्रमा पुग्न आएका पर्यटकसमेत बाटोबाटै फर्किने गरेको वडाध्यक्ष शर्माले बताउनुभयो ।

रुकुमपश्चिम, जाजरकोट र डोल्पाको ‘लाइफलाइन’ मानिएको भेरी करिडोर भारतको रुपैडियादेखि नेपालगन्ज हुँदै चीनको सीमा क्षेत्र मोरिम्ला नाकासम्म जोडिने भएकाले राष्ट्रिय महत्वको सडकका रूपमा समेत लिइन्छ ।

Originally published on abcnews.com.np.