काठमाडौं । बाढी पूर्वानुमान महाशाखाले आज (बिहीबार) देशका विभिन्न स्थानका खोला तथा नदीमा पानीको बहाव बढ्न सक्ने भन्दै ११ जिल्ला तथा आसपासका क्षेत्रमा आकस्मिक बाढीको मध्यम जोखिम रहेको जनाएको छ। महाशाखाले नदी तथा खोला आसपासका बासिन्दालाई सतर्कता अपनाउन आग्रह गरेको छ।

महाशाखाका अनुसार ताप्लेजुङ, सोलुखुम्बु, खोटाङ, कास्की, लमजुङ, पर्वत, पाल्पा, तनहुँ, म्याग्दी, जुम्ला र दैलेख भएर बहने साना नदी तथा खोलामा बहाव उल्लेख्य बढ्न सक्ने सम्भावना छ।

वर्षा हुने क्रम जारी रहेकाले कमजोर तथा भिरालो भूभागमा रहेका खोला–नदीमा पानीको सतह अचानक बढ्न सक्ने भएकाले स्थानीयवासीलाई विशेष सावधानी अपनाउन महाशाखाले अनुरोध गरेको छ।

बाढीको जोखिम बढ्न सक्ने

आज देशका अधिकांश भूभागमा वर्षाको सम्भावना रहेकाले नदी तथा खोलामा बहाव बढ्न सक्ने पूर्वानुमान गरिएको छ। यसअघि पनि पछिल्ला दिनमा विभिन्न पहाडी तथा हिमाली जिल्लामा साना नदीमा बहाव बढेर आकस्मिक बाढीको जोखिम देखिएको थियो।

महाशाखाले नदी किनार, खोला आसपास तथा बाढी प्रभावित क्षेत्रमा बसोबास गर्ने नागरिकलाई आवश्यक सतर्कता अपनाउन र जोखिमयुक्त स्थानमा नजान आग्रह गरेको छ।

Originally published on abcnews.com.np.