धनगढी । नेपाली कांग्रेसका पूर्वसभापति शेरबहादुर देउवा स्वदेश फर्किएपछि काठमाडौंमा स्वागतका लागि देशभरबाट नेता–कार्यकर्ता पुगे पनि सुदूरपश्चिम प्रदेशका मुख्यमन्त्री, मन्त्री तथा सांसदहरूको उल्लेख्य उपस्थिति देखिएन ।
देउवाको स्वागतका लागि काठमाडौं पुगेका कांग्रेसका केही सांसद मुख्यमन्त्री कमलबहादुर शाहले विश्वासको मत लिने वा राजीनामा दिने विषयमा निर्णय गर्नुपर्ने भएपछि कैलाली फर्किएका हुन् ।
कांग्रेस प्रमुख सचेतक सरस्वती खड्का, पूर्वमन्त्री मेघराज खड्का, बहादुर थापा र सांसद पदम शाही देउवाको स्वागतका लागि काठमाडौं पुगेका थिए । तर, मुख्यमन्त्री शाहले विश्वासको मत लिने तयारी गरेपछि उनीहरू बिहीबार बिहानै कैलाली फर्किएका हुन् ।
प्रमुख सचेतक खड्काले मुख्यमन्त्रीले विश्वासको मत लिने तयारी गरेपछि आफूहरू काठमाडौंमा बस्न नसकेको बताइन् ।
‘मुख्यमन्त्रीज्यूले विश्वासको मत लिने तयारी गरेपछि हामी काठमाडौंबाट फर्किएका हौँ । विश्वासको मत लिने भएपछि अनुपस्थित हुने कुरा हुँदैन,’ उनले भनिन् ।
आजै सकिँदैछ समयसीमा
नेकपा एमालेले साउन ३१ गते प्रदेश सरकारलाई दिएको समर्थन फिर्ता लिएपछि मुख्यमन्त्री शाह अल्पमतमा परेका छन् । संवैधानिक व्यवस्थाअनुसार समर्थन फिर्ता लिएको ३० दिनभित्र मुख्यमन्त्रीले विश्वासको मत लिनुपर्ने वा राजीनामा दिनुपर्ने अवस्था छ ।
उक्त समयसीमा बिहीबार सकिँदैछ ।
यसअघि बुधबार मुख्यमन्त्रीको सरकारी निवासमा बसेको कांग्रेस संसदीय दलको बैठकमा पनि विश्वासको मत लिने वा राजीनामा दिने विषयमा छलफल भएको थियो । काठमाडौंमा रहेका चार सांसद भने उक्त बैठकमा सहभागी भएका थिएनन् ।
२७ सांसदको समर्थन आवश्यक
मुख्यमन्त्री शाहले विश्वासको मत लिने तयारी गरेपछि बिहीबार दिउँसो ३ बजे पुनः कांग्रेस संसदीय दलको बैठक बोलाइएको छ ।
सुदूरपश्चिम प्रदेशसभामा सरकार जोगाउन २७ सांसदको समर्थन आवश्यक पर्छ । कांग्रेसका १८ सांसद मुख्यमन्त्री शाहको पक्षमा रहे पनि तीमध्ये सांसद प्रकाश देउवा हाल अमेरिकामा छन् ।
सरकार जोगाउन कांग्रेसको समर्थनबाहेक थप १० सांसद आवश्यक पर्ने अवस्था छ । पर्याप्त समर्थन जुट्ने सुनिश्चितता नभएपछि कांग्रेसकै केही सांसदले मुख्यमन्त्री शाहलाई राजीनामा दिन सुझाव दिएको बताइएको छ ।
मुख्यमन्त्रीले भने विश्वासको मत लिने तयारी गरेपछि देउवाको स्वागतका लागि काठमाडौं पुगेका सांसदहरू कार्यक्रममै सहभागी नभई कैलाली फर्किएका हुन् ।
उनीहरू आवश्यक परे शुक्रबार बिहान पुनः काठमाडौं जाने तयारीमा रहेको बताइएको छ ।
Originally published on abcnews.com.np.
प्रतिक्रिया दिनुहोस्