काठमाडौं। अमेरिकाले इरानमाथि थप कडा आर्थिक प्रतिबन्ध लगाउने चेतावनी दिएको छ।

अमेरिकी अर्थमन्त्री स्कट बेसेन्टले इरानले विश्वले यसअघि कहिल्यै नदेखेको स्तरको ‘आर्थिक एकान्तवास’ सामना गर्नुपर्ने अवस्था आउन सक्ने बताएका छन्।

अमेरिकी च्यानल ‘न्युजम्याक्स’सँगको कुराकानीमा बेसेन्टले इरानमाथि नयाँ प्रतिबन्ध तथा अन्य आर्थिक उपाय आगामी साता घोषणा हुन सक्ने बताए।

उनका अनुसार अमेरिकी रणनीति दुई तहमा अघि बढ्नेछ। पहिलो चरणमा इरानमाथि वित्तीय दबाब बढाइनेछ भने दोस्रो चरणमा इरानी बन्दरगाहमा प्रभावकारी रोक लगाउने दिशामा कदम चालिनेछ।

होर्मुज जलमार्गमा जारी नाकाबन्दीका कारण इरानी बन्दरगाहबाट हुने वस्तुको ओसारपसार प्रभावित हुने र त्यसले इरानको अर्थतन्त्रमा थप दबाब सिर्जना गर्ने बेसेन्टको भनाइ छ।

तेलको मूल्य घटाउनु अमेरिकाको प्राथमिकता

यसैबीच, अमेरिकी उपराष्ट्रपति जेडी भान्सले इरानसँग जारी तनावका बीच अमेरिकाको पहिलो प्राथमिकता घरेलु बजारमा तेल र पेट्रोलको मूल्य कम राख्नु रहेको बताएका छन्।

उनका अनुसार इरानलाई परमाणु हतियार प्राप्त गर्नबाट रोक्नु अमेरिकाको दोस्रो प्राथमिकता हो।

अघिल्लो अडानभन्दा फरक धारणा

बेसेन्टको पछिल्लो अभिव्यक्ति अगस्ट ४ मा व्यक्त उनको अघिल्लो धारणाभन्दा फरक देखिएको छ।

त्यतिबेला उनले होर्मुज जलमार्ग पुनः खोल्ने विषयमा इरानसँग केही दिनभित्रै सम्झौता हुन सक्ने बताएका थिए। उनको उक्त अभिव्यक्तिपछि वालस्ट्रिटमा तीव्र गतिविधि देखिँदा अन्तर्राष्ट्रिय बजारमा तेलको मूल्यसमेत घटेको थियो।

Originally published on abcnews.com.np.