काठमाडौं । कोसी प्रदेशका पूर्वमुख्यमन्त्री तथा नेपाली कांग्रेसका नेता केदार कार्कीले निवर्तमान सभापति शेरबहादुर देउवालाई पक्राउ नगरिएको भन्दै कांग्रेसकै केही नेताले विरोध गरिरहेको आरोप लगाएका छन्।

शुक्रबार संस्थापनइतर पक्षले आयोजना गरेको राष्ट्रिय भेलालाई सम्बोधन गर्दै कार्कीले पार्टीभित्रैबाट देउवाको पक्राउको माग गर्दै आलोचना गर्ने प्रवृत्ति देखिएको बताए।

देउवा स्वदेश फर्किँदा अन्य राजनीतिक दलले विरोध नगरे पनि कांग्रेसकै केही व्यक्तिले उनको विरोधमा ‘स्याल हुइयाँ’ गरेको कार्कीको आरोप थियो।

“हिजो एमालेले विरोध गरेन, माओवादीले विरोध गरेन, रास्वपाले गरेन,” कार्कीले भने, “तर कांग्रेसको चारतारे झन्डा ओढेको भनेर नक्कली व्यक्तिहरूले किन पक्राउ गरिएन भनेर स्याल हुइयाँ गरिरहेका छन्।”

कार्कीले देउवाले विगतमा व्यक्त गर्दै आएको लोकतन्त्रसम्बन्धी धारणा स्मरण गर्दै कांग्रेस लोकतान्त्रिक मूल्य र मान्यताका लागि निरन्तर संघर्ष गर्न तयार रहेको बताए।

“ज्ञानेन्द्रले नसकेको प्रजातन्त्र खोस्न अरूले सक्दैन। हामी ढुक्क छौँ, अब हामी लडाइँ लड्नेछौँ,” उनले भने।

पुराना नेताको अपमान भएको आरोप

कार्कीले कांग्रेसमा लामो राजनीतिक संघर्ष गरेका पुराना नेताहरूलाई अहिले अपमान गर्ने प्रवृत्ति बढेको आरोप लगाए।

उनले पञ्चायतकालदेखि प्रजातन्त्रका लागि संघर्ष गरेका नेता तथा कार्यकर्ताको योगदानलाई बिर्सेर पार्टी सञ्चालन गर्न खोजिएको भन्दै असन्तुष्टि व्यक्त गरे।

“नेताहरू पञ्चायतमा, राजाको पालामा जेल जानुभयो। आँखा फुट्दा कांग्रेस छाड्नुभएन। जेल जाँदा, छोराछोरी रुँदा, बाउ मर्दा कांग्रेस छाड्नुभएन,” उनले भने।

त्यस्ता नेताहरूको योगदानलाई अपमान गरेर पार्टी चलाउन खोज्ने प्रवृत्तिबाट कांग्रेसलाई जोगाउनुपर्ने उनको भनाइ थियो।

“ती नेताहरूलाई अपमान गरेर पार्टी चलाउँछु भन्ने अपराधीको मानसिकताबाट पार्टीलाई हामीले बचाउनु छ,” कार्कीले भने।

‘पार्टी कार्यालयमा अपरिपक्व नेतृत्व हाबी भयो’

कार्कीले कांग्रेसको केन्द्रीय कार्यालयमा अपरिपक्व तथा गैरकांग्रेसी प्रवृत्तिका व्यक्तिहरू हाबी भएको आरोपसमेत लगाए।

उनले पार्टीका गतिविधिलाई सामाजिक सञ्जाल र टिकटक केन्द्रित बनाइएको भन्दै आलोचना गरे।

“टिकटकको सुटिङ गरेर पार्टीलाई छियाछिया बनाएका छन्,” उनले भने, “गैरलोकतन्त्रवादी, गैरकांग्रेस, केही कम्युनिस्टका बुद्धिव्यवसायीलाई राखेर कांग्रेसका नेता र अग्रजलाई गाली गर्ने तालिम लिइरहेका छन्।”

आफ्ना कार्यकर्ता, नेता र समर्थकको योगदानबाट निर्माण भएको पार्टी कार्यालयमा गैरकांग्रेसी व्यक्तिहरूको प्रभाव स्वीकार्य नहुने उनले बताए।

“हाम्रो क्रियाशील, रगत र पसिनाले बनेको पार्टी कार्यालयमा गैरकांग्रेसलाई रजगज गर्ने अधिकार छैन,” कार्कीले भने।

कार्कीको अभिव्यक्ति कांग्रेसभित्र नेतृत्व, पुस्तान्तरण र पार्टीको वैचारिक दिशाबारे तीव्र विवाद भइरहेका बेला आएको हो। उनले पुराना नेताको योगदानको सम्मान, पार्टीभित्रको लोकतान्त्रिक संस्कार र संगठनमाथि कार्यकर्ताको स्वामित्व कायम गर्नुपर्ने सन्देश दिएका छन्।

Originally published on abcnews.com.np.