काठमाडौं । नेपाली कांग्रेसका नेता कुन्दन काफ्लेले संस्थापनइतर पक्षले आयोजना गरेको राष्ट्रिय भेलाले पार्टीलाई स्पष्ट दिशा दिने बताएका छन्। उनले कांग्रेसलाई सही दिशामा अघि बढाउन भेलाले महत्वपूर्ण भूमिका खेल्ने दाबी गरे।

शुक्रबार काठमाडौंमा सुरु भएको राष्ट्रिय कार्यकर्ता भेलालाई सम्बोधन गर्दै काफ्लेले कांग्रेसभित्र पछिल्लो समय पार्टी कमजोर हुँदा खुसी हुने प्रवृत्ति विकास भएको भन्दै त्यसको अन्त्य गर्नुपर्ने बताए।

“कांग्रेसलाई अप्ठेरो पर्दा खुच्चिङ भन्ने प्रवृत्ति पार्टीभित्र विकास भएको छ,” उनले भने। यस्तो प्रवृत्तिले पार्टीलाई बलियो बनाउन नसक्ने भन्दै काफ्लेले आन्तरिक एकता र संगठन सुदृढीकरणमा ध्यान दिनुपर्नेमा जोड दिए।

उनले कांग्रेसभित्र अरूलाई कमजोर देखाएर आफूलाई बलियो ठान्ने प्रवृत्ति समेत बढेको टिप्पणी गरे। व्यक्तिगत गुट र स्वार्थभन्दा माथि उठेर पार्टीको हितमा काम गर्नुपर्ने उनको भनाइ थियो।

“अरूलाई कमजोर देखाएर आफूलाई बलियो ठान्ने प्रवृत्ति विकास भएको छ। १५औँ महाधिवेशनमा त्यो भाइरसलाई ठेगान लगाउनुपर्ने आवश्यकता छ,” काफ्लेले भने।

काफ्लेले कांग्रेसको १५औँ महाधिवेशन सुनिश्चित गर्न पार्टीका शीर्ष नेताहरूलाई आग्रहसमेत गरे। महाधिवेशनलाई अनिश्चित बनाउने वा आन्तरिक विवादमा अल्झाउनेभन्दा समयमै महाधिवेशन सम्पन्न गरी पार्टीलाई नयाँ दिशामा अघि बढाउनुपर्ने उनको भनाइ छ।

उनका अनुसार राष्ट्रिय भेलाको उद्देश्य कुनै समूहलाई कमजोर बनाउनु नभई कांग्रेसलाई एकताबद्ध, सुदृढ र प्रभावकारी राजनीतिक शक्तिका रूपमा पुनःस्थापित गर्नु हुनुपर्छ।

काफ्लेले पार्टीभित्र देखिएका असन्तुष्टि, गुटगत प्रतिस्पर्धा र नेतृत्वसम्बन्धी विवादको समाधान लोकतान्त्रिक विधि र महाधिवेशनबाट खोज्नुपर्नेमा जोड दिए।

उनको अभिव्यक्ति कांग्रेसभित्र १५औँ महाधिवेशन, नेतृत्व हस्तान्तरण र पार्टीको आगामी राजनीतिक दिशाबारे बहस तीव्र भइरहेका बेला आएको हो। भेलाले पार्टीभित्रको असन्तुष्टिलाई संस्थागत बहसमा रूपान्तरण गर्दै महाधिवेशनमार्फत नयाँ नेतृत्व र स्पष्ट राजनीतिक दिशातर्फ अघि बढ्न दबाब सिर्जना गर्नुपर्ने उनको सन्देश थियो।

Originally published on abcnews.com.np.