काठमाडौं । उद्योगमन्त्री गौरीकुमारी यादवले व्यवसायी तथा निजी क्षेत्रलाई कपास खेतीमा लगानी गर्न आह्वान गरेकी छन् ।

नेपालका कपडा उद्योगले आवश्यक कच्चा पदार्थका रूपमा ठूलो परिमाणमा कपास विदेशबाट आयात गर्नुपर्ने अवस्था अन्त्य गर्न स्वदेशमै कपास उत्पादन बढाउनुपर्ने उनको भनाइ छ ।

मन्त्री यादवले स्वदेशमै कपास उत्पादन गरी कपडा उद्योगका लागि आवश्यक कच्चा पदार्थको आपूर्ति सुनिश्चित गर्ने उद्देश्यले निजी क्षेत्रलाई कपास खेतीतर्फ आकर्षित हुन आग्रह गरेकी हुन् ।

यस विषयमा मन्त्री यादवले कृषि मन्त्री गीता चौधरीसँग समेत भेट गरी नेपालमा कपास खेती विस्तार गर्नेबारे छलफल गरेकी थिइन् । छलफलका क्रममा कृषि मन्त्री चौधरीले दाङ, बाँके र बर्दियालगायत जिल्लामा कपास खेतीका लागि उपयुक्त वातावरण रहेको बताएकी थिइन् ।

नेपालमा कपास खेतीको पर्याप्त सम्भावना भए पनि व्यावसायिक रूपमा ठूलो क्षेत्रफलमा खेती हुन नसक्दा कपडा उद्योग आवश्यक कच्चा पदार्थका लागि विदेशमा निर्भर हुँदै आएका छन् ।

सरकारले कपडा उद्योगसँगै कपास उत्पादनलाई प्राथमिकता दिन सके आयात प्रतिस्थापन, रोजगारी सिर्जना र किसानको आम्दानी वृद्धि गर्न सकिने अपेक्षा गरिएको छ ।

यसैबीच, लामो समयदेखि बन्द रहेको बुटवल धागो कारखाना पुनः सञ्चालन गर्ने प्रक्रिया पनि अघि बढेको छ । उद्योग विभागका महानिर्देशक जितेन्द्र बस्नेतका अनुसार कारखाना सञ्चालनका लागि सम्पत्ति तथा दायित्वको मूल्यांकन गर्ने काम अन्तिम चरणमा पुगेको छ ।

Originally published on abcnews.com.np.