कञ्चनपुर । करिब २८ वर्षदेखि बन्द रहेको महेन्द्रनगर विमानस्थल पुनः सञ्चालनमा ल्याउने तयारी तीव्र पारिएको छ । नेपाल नागरिक उड्डयन प्राधिकरण (क्यान)ले चालु आर्थिक वर्षको बजेटमा रकम विनियोजन गर्दै विमानस्थल सञ्चालनको प्रक्रिया अघि बढाएको हो ।

विमानस्थल सञ्चालनमा आए पश्चिम नेपालका साथै भारतीय पर्यटकको आवागमन बढ्ने र यस क्षेत्रको आर्थिक गतिविधि चलायमान हुने स्थानीयको अपेक्षा छ ।

कञ्चनपुर–३ का सांसद ज्ञानेन्द्रसिंह महराको पहल तथा सभामुख डोलप्रसाद अर्यालको समन्वयमा असार २५ गते विमानस्थल सञ्चालनका विषयमा सर्वपक्षीय छलफल भएको थियो । त्यसपछि संस्कृति, पर्यटन तथा नागरिक उड्डयनमन्त्री खडकराज पौडेल र क्यानका महानिर्देशक मुकेश डंगोललगायत अधिकारीले साउन ५ र ६ गते महेन्द्रनगर तथा टीकापुर विमानस्थलको स्थलगत अनुगमन गरेका थिए ।

अनुगमनपछि महेन्द्रनगर विमानस्थल सञ्चालनको काम अघि बढाउने र टीकापुर विमानस्थललाई तत्काल ‘होल्ड’मा राख्ने निष्कर्ष निकालिएको छ ।

धावनमार्ग विस्तार अन्तिम चरणमा

क्यानका उपमहानिर्देशक प्रेमनाथ ठाकुरका अनुसार महेन्द्रनगर विमानस्थल सञ्चालनका लागि आवश्यक काम अघि बढिसकेको छ । उनका अनुसार चालु आर्थिक वर्षमा बजेट विनियोजन गरेर धावनमार्ग, टर्मिनल भवन, तारबारलगायत संरचनाको काम अघि बढाइनेछ ।

विमानस्थलको धावनमार्ग यसअघि करिब एक हजार मिटर लामो थियो । एटीआर विमान सञ्चालन गर्न सक्ने गरी विस्तार थालिएको धावनमार्गको लम्बाइ १ हजार ५२५ मिटर पुर्‍याउने योजना छ । हालसम्म करिब १ हजार ४५० मिटर निर्माण भइसकेको र बाँकी ७५ मिटरको काम जारी रहेको छ ।

धावनमार्गको एक तह कालोपत्रे भइसकेको छ भने टर्मिनल भवन मर्मत, विमानस्थल वरिपरि तारबार र अन्य सुधारका काम बाँकी छन् । धावनमार्ग विस्तार सम्पन्न भएपछि ७२ सिटसम्म यात्रु बोक्ने एटीआर विमान सञ्चालन गर्न सकिने क्यानले जनाएको छ ।

२०५५ देखि बन्द

महेन्द्रनगर विमानस्थल २०५५ सालसम्म सञ्चालनमा थियो । सशस्त्र द्वन्द्वपछि बन्द भएको विमानस्थल पुनः सञ्चालनका लागि पटक–पटक प्रयास भए पनि सफल हुन सकेको थिएन ।

२०७७ सालमा संघ, प्रदेश र स्थानीय तहको लागत साझेदारीमा विमानस्थल सञ्चालन गर्ने योजना बनेको थियो । त्यसअनुसार क्यानले ५० प्रतिशत, सुदूरपश्चिम प्रदेशले २५ प्रतिशत, भीमदत्त नगरपालिकाले १५ प्रतिशत र दोधारा चाँदनी नगरपालिकाले १० प्रतिशत लगानी गर्ने सहमति भएको थियो ।

प्रसारणलाइन र रुख हटाउनुपर्ने

६२ बिघा क्षेत्रफलमा फैलिएको विमानस्थलमा नयाँ जग्गा अधिग्रहणको समस्या छैन । तर, विमानस्थलको जग्गाबाट गएको नेपाल विद्युत् प्राधिकरणको थ्री–फेज प्रसारणलाइन हटाउनुपर्नेछ ।

त्यस्तै, शुक्लाफाँटा राष्ट्रिय निकुञ्जको सीमामा रहेको विमानस्थल क्षेत्रमा नेपाली सेनाले प्रयोग गर्दै आएको खेल मैदान हटाउनुपर्ने र वरपरका केही रुख व्यवस्थापन गर्नुपर्ने अवस्था रहेको छ ।

दिल्ली–काठमाडौं उडानको सम्भावना

महेन्द्रनगर विमानस्थल सञ्चालनमा आए कञ्चनपुर तथा आसपासका नागरिकलाई धनगढी विमानस्थलसम्म पुग्नुपर्ने बाध्यता हट्नेछ । अहिले महेन्द्रनगरबाट धनगढी विमानस्थल पुग्न करिब ६३ किलोमिटर सडक यात्रा गर्नुपर्ने अवस्था छ ।

विमानस्थल सञ्चालनपछि भारतको दिल्लीसँग समेत हवाई सम्पर्क विस्तार गर्न सकिने सम्भावना रहेको क्यानका अधिकारीहरूको भनाइ छ । क्यानका उपमहानिर्देशक ठाकुरले महेन्द्रनगर विमानस्थल व्यावसायिक रूपमा सम्भाव्य रहेको बताएका छन् ।

Originally published on abcnews.com.np.