काठमाडौं । टाटा मोटर्सको नेपालका लागि आधिकारिक वितरक सिप्रदी ट्रेडिङ प्रालिले ‘नाइमा नेपाल मोबिलिटी एक्स्पो २०२६’को अवसरमा नयाँ पन्च इभी विशेष अफरसहित सार्वजनिक गरेको छ ।

काठमाडौंको भृकुटीमण्डपमा जारी एक्स्पोको अन्तिम दिनसम्म बुकिङ गर्ने ग्राहकले पन्च इभीमा १ लाख रुपैयाँसम्मको मूल्य लाभ पाउने कम्पनीले जनाएको छ ।

नयाँ पन्च इभीको सुरुवाती मूल्य ३३ लाख ९९ हजार रुपैयाँ तोकिएको छ । तर, एक्स्पो अवधिभर बुकिङ गर्ने ग्राहकले ३२ लाख ९९ हजार रुपैयाँमा गाडी खरिद गर्न सक्नेछन् । आज एक्स्पोको अन्तिम दिन भएकाले विशेष अफरको पनि आजै अन्तिम दिन रहेको कम्पनीले जनाएको छ ।

भोलिदेखि भने पन्च इभीको सुरुवाती मूल्य पुनः ३३ लाख ९९ हजार रुपैयाँ कायम हुनेछ ।

एक्स्पोमा पन्च इभी बुकिङ गर्ने ग्राहकलाई कम्पनीले ११ वर्ष वा २ लाख २० हजार किलोमिटरसम्मको विस्तारित वारेन्टी सुविधा पनि उपलब्ध गराएको छ ।

३२५ किलोमिटरसम्म रेन्ज

अत्याधुनिक ‘एक्टिभ इभी’ प्लेटफर्ममा आधारित नयाँ पन्च इभी ३२ किलोवाट–घण्टा र ४० किलोवाट–घण्टा क्षमताका दुई ब्याट्री विकल्पमा उपलब्ध छ । नेपालमा गरिएको परीक्षणअनुसार यसले एकपटक पूर्ण चार्जमा ३०० देखि ३२५ किलोमिटरसम्म रेन्ज दिने कम्पनीको दाबी छ ।

गाडीमा १९५ मिलिमिटर ग्राउन्ड क्लियरेन्स, बीएनक्याप ५–स्टार सुरक्षा रेटिङ, ६ वटा एयरब्याग, ३६० डिग्री क्यामेरा र १.५सी डीसी फास्ट चार्जिङ सुविधा रहेको छ ।

त्यस्तै, भ्वाइस एक्टिभेटेड सनरुफ, २६.०३ सेन्टिमिटरको हर्मन इन्फोटेनमेन्ट तथा डिजिटल ककपिट, भेन्टिलेटेड सिट र ३६६ लिटरको बुट स्पेसलगायत सुविधा पन्च इभीमा समावेश गरिएको कम्पनीले जनाएको छ ।

Originally published on abcnews.com.np.